“Şahdəniz” yatağının işlənməsi 4 mühüm layihədən biridir. Bu layihələr enerji təhlükəsizliyi üçün çox önəmli layihələrdir. Biz Türkiyə ilə birgə enerji layihələri icra edirik”.
Modern.az-ın xəbərinə görə, bunu Azərbaycan Prezidenti İlham Əliyev İstanbulda keçirilən 23-cü Dünya Enerji Konqresindəki çıxışında deyib.
Prezident bildirib ki, Cənub Qaz Dəhlizi (SGC) icrasında 7 ölkə birləşib:
“Gələcəkdə daha bir neçə ölkə bu layihəyə qoşula bilər. Müstəqilliyimizin ilk illərində Azərbaycan iqtisadiyyatı neft və qaza bağlı idi. Amma indi iqtisadiyyatımızda neft və qaz cəmi 30% təşkil edir”.
Dövlət başçısı bildirib ki, Bakıda ilk neft 100 il əvvəl çıxarılıb: “Dünyada ilk dəfə dənizdən də neft məhz Azərbaycanda, Xəzərdə çıxarılıb”.
“Əsrin müqaviləsi”nə toxunan ölkə başçısı deyib ki, bu il Azərbaycan müstəqilliyinin 25-ci ildönümü qeyd edəcək:
“Azərbaycanın müstəqilliyində enerji layihələri böyük rol oynayıb. Bu gün Azərbaycan neftini dünya bazarına çıxarmaq üçün üç marşrut var. Bunlardan ikisi Qara dənizə, biri - Bakı-Tbilsi-Ceyhan neft kəməri isə Aralıq dənizinə çıxır. Biz ilk dəfə Xəzər dənizi ilə Aralıq dənizini birləşdirdik”.
Dövlət başçısı qeyd edib ki, Azərbaycanda təsdiq edilmiş qaz ehtiyatlarının həcmi 2,6 trilyon kubmetrdir:
“Bu, böyük qaz ehtiyatlarının daşınması üçün kəmərə ehtiyac var idi. Azərbaycan və Türkiyə bu sahədə də liderlik etdi və TANAP layihəsinin tikintisinə start verdi.
TANAP-ın daxil olduğu Cənub Qaz dəhlizi layihəsinin dəyəri 45 milyard dollardır. Azərbaycan və Türkiyə Cənub Qaz dəhlizinin həyata keçirilməsində liderlik keyfiyyətlərini göstərir. Enerji ölkələrin təhlükəsizliyində əsas amillərdən biridir”.
Ağa AKİFOĞLU
