Milli Məclisin Səhiyyə Komitəsinin sədri, 65 saylı Saatlı-Sabirabad-Kürdəmir seçki dairəsindən deputat seçilmiş akademik Əhliman Əmiraslanov bu gün Milli Məclisdə vətəndaşları növbəti dəfə qəbul edib.
Qəbulda həm 65 saylı Saatlı-Sabirabad-Kürdəmir seçki dairəsindən olan seçicilər, həm də Səhiyyə komitəsinə müraciət edən səhhətində problem olan insanlar iştirak etmişdir. Ə.Əmiraslanov qəbula gələn vətəndaşları dinləyərək onları narahat edən məsələlər haqqında məlumat almışdır. Müraciət edən seçicilər əsasən sosial problemlər, işlə təmin olunma ilə bağlı şikayətlərini deputata çatdırıblar. Qəbulda həmçinin müalicə, müxtəlif cərrahi əməliyyatlar və orqan köçürülməsi ilə bağlı müraciətlər də olub.
Əhliman Əmiraslanov bütün müraciətləri ayrı-ayrılıqda dinləyərək qeyd edilən problemlərin həlli istiqamətində müvafiq addımlar atılacağını bildirdi. Bununla yanaşı bəzi problemlərin aradan qaldırılması məqsədilə vətəndaşlardan sənədlər qəbul edilərək müvafiq orqanlara müraciətlərin hazırlanması üçün göstərişlər verilib.
Modern.az
