Hazırda respublika ərazisində qarlı-şaxtalı hava şəraiti hökm sürür. Quba rayon icra başçısı yanında Fövqəladə komissiyanın sədri Yusif Abidov Modern.az-a açıqlamasında deyib ki, Qubada yağan qarın hündürlüyü şəhərdə 20 santimetr, nisbətən yuxarı ərazilərdə 30 santimetrə çatıb:
“Hazırda qar yağır, 8 dərəcə şaxta müşahidə edilir. Yollara qum, duz səpilib. Qaz, işıq, su verilişində heç bir çətinliyimiz yoxdur. Amma dağ kəndlərinə gediş-gəlişdə çətinliklər var. Xüsuilə Xınalıq yolu təhlükəlidir. İşıq, qaz, su, telefon normal şəkildə işləyir”.
Lerik Fövqaladə Hallar Komissiyasının sədri Habil Məlikov da saytımıza açıqlamasında rayonda güclü qar yağdığını deyib:
“Qarın hündürlüyü təxminən 35 santimetrdən çoxdur. Magistiral yolumuz olan Lənkəran-Lerik, kəndlərə gedən yollar açıqdır. İşıq, qaz, su sisemində heç bir problem yoxdur. Amma qar yağmağa davam edir”.
Qeyd edək ki, Ekologiya və Təbii Sərvətlər Nazirliyi yanvarın 26-dan etibarən fevralın 2-dək respublika ərazisində havaların kəskin soyuyacağı, qar yağacağı və yolların buz bağlayacağı ilə bağlı xəbərdarlıq edib.
Gülşən RAUFQIZI
