Bu gün UEFA Avropa Liqasının ilk təsnifat mərhələsində komandalarımız cavab görüşlərini keçirib. Modern.az xəbər verir ki, "Zirə" komandası səfərdə Lüksemburqun "Differdanj" klubu ilə qarşılaşıb. Oyunun 11-ci dəqiqəsində rəqib komandanın oyunçusu Vandenbroeck hesabı açıb.
"Zirə"nin oyunçusu Manga 64-cü dəqiqədə hesabı bərabərləşdirib. 68-ci dəqiqədə isə Qadze "Zirə"ni hesabda önə çıxarıb. Oyun "Zirə"nin 2:1 hesablı qələbəsi ilə başa çatıb.
Qeyd edək ki, tarixində ilk dəfə avroliqada çıxış edən "Zirə" ilk qarşılaşmada da rəqibdən 2:0 hesabı ilə üstün olmuşdu. İki oyunun nəticəsinə görə rəqibi 4:1 hesabı ilə məğlub edən "Zirə" növbəti mərhələyə vəsiqə qazanıb.
Onu da bildirək ki, “Zirə” futbol komandası Avropa Liqasının I təsnifat mərhələsində Lüksemburda “Differdanj” komandası ilə cavab matçına qara sarğı ilə çıxıb. Paytaxt klubu iyulun 4-də Ermənistan silahlı qüvvələrinin Azərbaycanın Füzuli rayonunun Alxanlı kəndinin mülki əhalisini atəşə tutması nəticəsində Sahibə Allahverdiyeva və onun nəvəsi, 2 yaşlı Zəhra Quliyevanın qətlə yetirilməsi ilə əlaqədar olaraq belə bir addım atıb.
Modern.az
