Modern.az

Eks-nazirlərin aqibətini yaşamaq istəmirsinizsə, oğurladıqlarınızı qaytarın - Oliqarxların çöküşü

Eks-nazirlərin aqibətini yaşamaq istəmirsinizsə, oğurladıqlarınızı qaytarın - Oliqarxların çöküşü

Ölkə

19 Dekabr 2017, 08:51

 

2017-ci il Azərbaycan siyasətində bir sıra gözlənilməz və səs-küylü hadisələrlə yadda qaldı. Söhbət təbii ki, ilk növbədə bəzi oliqarx nazirlərin tifağının dağılmasından gedir. İllərdir tutduqları postlardan sui-istifadə edərək, 7 arxadönəninə qədər hamıya varidat yığan həmin nazirlər istəməsələr də, adlarına “patentləşdirdikləri” kreslonu tərk etməli oldular.

2015-ci ildə keçmiş milli təhlükəsizlik naziri Eldar Mahmudovla başlayan “təmizləmə” hələlik vergilər naziri Fazil Məmmədovla yekunlaşıb. Hələlik deyirik, çünki məmur islahatının 2018-ci ildə də davam edəcəyi istisna edilmir.


Ölkənin təhlükəsizliyinə birbaşa cavabdeh qurumun rəhbərliyini üstlənən Eldar Mahmudovun ev dustağı olmasından sonra, illərdir nəqliyyat sahəsində kök salmış oliqarx Ziya Məmmədov bu ilin fevralında təmsil etdiyi nazirliyin ləğv edilərək yeni tərkibdə təşkil edilməsilə həzin sonluğuna acizanə surətdə baş əyməli oldu.

Payız son akkordlarını vergilər naziri Fazil Məmmədov üçün “vurdu”. Xəstəlikdənmi, ya vəzifədən sui-istifadədənmi, bir sözlə ya zəlzələdən, ya vəlvələdən o da sabiqlər sırasına qoşuldu...

Heç kimə sirr deyil ki, Eldar Mahmudov, Ziya Məmmədov, Fazil Məmmədov həddindən artıq varlanmış oliqarx-nazirlər idi. Rus ədəbiyyatşünası Eduard Servusun dediyi kimi: “Pulların səpildiyi yerdə təmizliyə riayət etmək çox çətindir”. Başlarından pul səpələnən oliqarxlar da qeyri-rəsmi, dolayı, qanunsuz yollarla milyonlarla vəsait əldə etmişdilər. Təmizliyə riayət etmək isə mümkünsüz idi. Hətta onların taladıqları sərvətin səsi ofşorlardan belə gəlirdi. İndi isə zaman yediklərini bir-bir qaytarmaq zamanıdır.

 

Bir vaxtlar ölkədə ümumi gəlirlər bəyannaməsi sisteminə keçid prosesi çərçivəsində qeyri-qanuni, vergidən yayınma yolu ilə əldə edilmiş və gizlədilmiş əmlak və gəlirlərin leqallaşdırılmasından ağızdolusu danışan F.Məmmədov indi hesabat verir. Nəinki F.Məmmədov, “qədər dostları” Z.Məmmədov və E.Mahmudov da dövlətin büdcəsindən sildikləri bütün vəsaiti geri ödəməyə vadar edilir.

Eyni zamanda bu, dövlət büdcəsindən oğurluq edən digər məmurlara da ciddi xəbərdarlıq kimi qəbul edilməlidir. Oğurladıqlarınızı geri qaytarmasanız Fazil Məmmədov, Ziya Məmmədov, Eldar Mahmudovun taleyini yaşayacaqsınız. Bu, qaçılmazdır.  

 

Milli Məclisin Hüquq siyasəti və dövlət quruculuğu komitəsinin üzvü Tahir Kərimli Modern.az-a deyib ki, dövlətin, xalqın pulunu, haqqını mənimsəmiş bütün korrupsionerlər son qəpiyinə qədər geri qaytarmalıdır:

“Onlar etdiklərinə layiqli məsuliyyət daşımalıdırlar. Bir hüquqşünas kimi bütün bu proseslərin hamısının hüquqi müstəvidə həyata keçirilməsinin tərəfdarıyam. Bir yazı oxudum. Yazırlar ki,  “Fələsin uşaqları israilliləri daşlayırlar, maşınları, insanları əzirlər”. Fələstin uşaqları haqlıdır, amma etdikləri qanunsuzluqdur. Ona görə də hər bir insan qanunla məsuliyyət daşımalıdır. Postundan uzaqlaşdırılmış eks-nazirlərin fəaliyyətləri zamanı nöqsanlara yol verdiklərinə dair şübhələr varsa, araşdırılmalı, sübut edilərək cəza kəsilməli və həmin vəsait qanunla geri qaytarılmalıdır”.

Deputat yüksək postlar tutmuş eks-nazirlərin işlərində nöqsanlara yol verdiklərini istisna etməyib:

“Rusiya prezidenti Vladimir Putin ənənəvi mətbuat konfransında belə bir açıqlama verdi. O belə dedi: “Federal Təhlükəsizlik Xidmətinin rəhbərini yanıma çağırıb material verdim, araşdırılmasını istədim. 6 ay əvvəl həmin xidmətin bütün əməkdaşlarını həbsə almışıq. 6 ay keçəndən sonra da korrupsiya ilə məşğul olurlar”.

Putinin bu açıqlamasından sitat gətirməkdə məqsədim var. Azərbaycan postsovet dövrünün ölkəsi olduğu üçün bizdə də oxşar hallar yaşanır. Biz ilk növbədə korrupsiya və rüşvəti yaradan şəraiti aradan qaldırmalıyıq. Yoxsa insanların bir postdan digər posta dəyişdirilməsi heç nəyi həll edə bilməz. Əlbəttə, şəxsi faktor da böyük rol oynayır. İnsan ədalətli, vicdanlı olmalıdır. İkincisi, təbii olaraq, insanlar topladığı pulları qorumağa çalışacaqlar. Həmin pulların qanuni, yaxud qanunsuz olmağı onları az maraqlandırır. Öz vəsaitini himayə etməklə təhlükəsizliklərini təmin etməyə çalışırlar. Düşünürəm ki, bu, anlaşılandır. Söhbət yenə də ona gəlir ki, hər şey hüquqi müstəvidə həll olunmalıdır”.

Telegram
Hadisələri anında izləyin!
Keçid et
Paşinyan Qazaxa gəldi - Ermənilər üzərinə hücum çəkdi