Gürcü mənşəli məşhur ABŞ generalı Con Şalikaşvili 75 yaşında vəfat edib. Modern.az CNN-ə istinadən bildirir ki, ABŞ hərbi qüvvələrinin birləşmiş qərargahlarının keçmiş rəhbəri Şalikaşvili ötən şənbə dünyasını dəyişib. O, Bill Klintonun dövründə 1993-97-ci illərdə bu vəzifəni tutub.
1936-cı ildə Polşada doğulan Conun nəsli qədim gürcü əsilzadələrindən olub. Onun vaildeynləri podpolkovnik knyaz Dimitri Şalikaşvili və qrafiniya Mariya Ridiqer olub. Ailə 1951-ci ildə ABŞ-a köçüb.
Vyetnam müharibəsində iştirak edən Şalikaşvili 1991-ci ildə NATO ordusununu Avropadakı komandanı olub. Con Şalikaşvilinin soyadı SSRİ-nin son illərində cəmiyyət arasında maraqla qarşılanmışdı. ABŞ ordusunda yüksək hərbi post tutan şəxsin gürcü olması o zaman müxtəlif müzakirələrə yol açmışdı.
