Yevlaxda məktəblilərin də içərisində olduğu mikroavtobusun "QAZ-53” markalı yük maşını ilə toqquşması nəticəsində yaralananlardan 1-i müəllim, 1-i katibə, 1-i isə sürücüdür.
Bu barədə BakuPost-a yaralıların bir qisminin aparıldığı Yevlax rayon Mərkəzi Xəstəxanasından məlumat verilib. Bildirilib ki, xəstəxanaya yüngül yaralanan şəxslər, yəni 15 nəfər gətirilib. Onlara ilkin tibbi yardım göstərilib və evə buraxılıb.
Ağır yaralanan 5 nəfər isə Mingəçevir Şəhər Xəstəxanasına aparılıb. Yaralılardan 2-sinin vəziyyəti ağırdır. 3-ünün vəziyyəti isə stabilləşib.
Məlumata görə, qəza nəticəsində xəsarət alanlardan 17-i Aran -1 qəsəbə məktəbinin sınaq imtahanına gedən şagirdləridir.