Arxiv
26 May 2018, 15:52 | MƏDƏNİYYƏT
“Dostlarımdan biri vardı, biri yox...” – Xankəndi məzunlarının görüşü

Adətən məktəb illəri həmişə xoş xatirələrlə yada düşür. İlk dərs, ilk müəllim, ilk və son zəng, ilk sevgi, gələcək üçün qurulan xəyallar, həyatın ilk sınaqları və imtahanları, bütün bunlar yaddaşın pozulmayan yerinə əbədi həkk olunur. Zaman bizləri o illərdən uzaqlaşdırdıqca, məktəb xatirələri insana daha da doğmalaşır...

 

Hamı kimi məktəb illəri, məktəb xatirələri mənim üçün də əzizdir. Amma hamı kimi mən o illəri ürəkdolusu, sevinclə xatırlaya bilmirəm. Təhsil aldığım Nizami Gəncəvi adına Xankəndi şəhər 4 nömrəli orta məktəb o qədər acılı-ağrılı bir yol keçib ki, bu təhsil ocağının tarixinini həyəcansız anmaq olmur. Yarandığı 1945-ci ildən erməni millətçiləri bu təhsil ocağının normal fəaliyyətini pozmaq üçün bütün vasitələrə əl atıblar.

 

Mənəvi, fiziki təzyiqlər, ögey münasibət, müxtəlif “tutarlı” bəhanələrlə məktəb binasının tez-tez yerini dəyişməsi Xankəndi şəhərində yeganə olan bu azərbaycandilli məktəbin fəaliyyətinə kifayət qədər ciddi zərbələr vurub. Ancaq bütün bunlara baxmayaraq məktəbin müəllim kollektivi  əsl mübarizlik nümayiş etdirərək azərbaycanlı uşaqların normal təhsil almalarına nail olublar, Azərbaycan cəmiyyəti üçün dəyərli vətəndaşlar yetişdiriblər.

 

Təəssüflər olsun ki, 1988-ci ilin sentyabr ayında erməni millətçilərinin Nizami Gəncəvi adına Xankəndi şəhər 4 nömrəli orta məktəbinin fəaliyyətinə son qoymaq cəhdi baş tutub. 700-dən çox şagirdin təhsil aldığı, 60-dan artıq müəllimin çalışdığı Nizami Gəncəvi adına Xankəndi şəhər 4 nömrəli orta məktəb fəaliyyətini dayandırmaq məcburiyyətində qalıb. Xankəndində yaşayan köməksiz azərbaycanlıların ciddi cəhdlərinə baxmayaraq məktəbin fəaliyyətini bərpa etmək mümkün olmayıb. Beləliklə, Qarabağ münaqişəsi, ermənilərin təcavüz siyasəti Azərbaycan təhsilinin inkişafında xüsusi xidmətləri olmuş Nizami Gəncəvi adına Xankəndi şəhər 4 nömrəli orta məktəbinin, onun müəllimlərinin və məzunlarınının taleyinə beləcə ağrılı-acılı səhifələr yazıb.

 

25 illik fasilədən sonra xankəndililərin istəyi, doğma məktəblərinin fəaliyyətinin yenidən bərpa olması arzusu həyata keçib. Azərbaycan təhsilinin inkişafına töhfələr vermiş, özünəməxsus bir tarix yaşamış bu təhsil ocağının xidmətləri prezident İlham Əliyev tərəfindən yüksək qiymətləndirilib. Dövlət başçısının 30 dekabr 2012-ci il tarixli sərəncamı ilə məktəbin fəaliyyəti yenidən bərpa olunub. Sərəncama əsasən Bakının Sabunçu rayonunun Ramanı qəsəbəsində müasir standartlara uyğun məktəb inşa edilərək istifadəyə verilib.

 

Hazırda Nizami Gəncəvi adına Xankəndi şəhər 4 nömrəli orta məktəbi xankəndililərin ən doğma məkanlarından birinə çevrilib. Tez-tez bu məktəbə yığışan xankəndililər doğma yurdun ətrini bu təhsil ocağından alırlar. Belə görüşlərdən biri də mayın 25-də keçirilib. Məzunlarla görüş adlı bu tədbirin təşəbbüskarı və təşkilatçıları Xankəndi Məcburi Köçkünlərə Dəstək İctimai Birliyi və məlum səbəblərdən bu məktəbdə sona qədər təhsilini başa vura bilməyən Bahar Orucova olub.

 

Məktəbin direktoru Nazim Xudiyev vaxtilə bu təhsil ocağında çalışan müəllimləri, məzunları qarşıladıqdan sonra qonaqları məktəbə dəvət edib. İki saatdan artıq çay süfrəsi arxasında davam edən tədbirdə millət vəkili Flora Qasımova, məktəbin Xankəndində fəaliyyət göstərdiyi dövrdə direktoru olan Sabir Əliyev, uzun illər bu məktəbdə çalışan, Dağlıq Qarabağ Muxtar Vilayətinin təhsil idarəsində müdir müvini vəzifəsində çalışmış Şura Xudiyeva, bu yazının müəllifinin sinif rəhbəri və ən sevimli müəllimi olan Telli Mirzəyeva, məzunlar Bahar Orucova, Xatirə Vəliyeva və digər qonaqlar xatirələrini bölüşüblər, ən kövrək hisslərlə məktəb illərini xatırlayıblar, Qarabağ müharibəsi zamanı şəhid olan məzunları, dünyasını dəyişmiş müəllimləri ehtiramla yad ediblər.

 

Tədbirdən sonra təşkilatçılar Xatirə Vəliyeva və Bahar Orucova belə görüşlərin ənənə halına çevriləcəyini söyləyiblər və vurğulayıblar ki, yaxın gələcəkdə qüdrətli Azərbaycan ordusunun böyük zəfərindən sonra məzunlarla görüş Xankəndi şəhərində, doğma məktəbdə keçiriləcək.

 

Adətən məzunlarla görüş tədbirlərində hamının gözü bir-birini axtarır. Amma bu görüşdə çoxlarının yeri boş qalmışdı:

Şahmuradov Natiq Əmirxan oğlu yox idi – Şuşanın müdafiəsi zamanı şəhid olub;

Quliyev Elçin Balaxan oğlu yox idi – Xocalı soyqırımı zamanı itkin düşüb;

Quliyev Azər Kamil oğlu yox idi – erməni terrorunun qurbanı olub;

Bəli, dostlarımdan biri vardı, biri yox və bu siyahını qisas və təəssüf  hissi ilə çox uzatmaq olar.

Biz onları unutmadıq və unutmayacağıq...

 

İlham Cəmiloğlu  

BU KATEQORİYADAN OLAN DİGƏR XƏBƏRLƏR
+ Arxiv
Azərbaycanda çəkilən “Stalinin qaranlıq keçmişi” filmi 4 festivalda uğur qazanıb 19 May 2019, 10:24 Ölüm ayağında ona xəyanət etmiş ərini arzulamışdı - 29 yaşında dul qalan məşhur - FOTOLAR 19 May 2019, 10:03 Saatlıda 80 yaşlı kişi özünü güllələdi - SƏBƏB 19 May 2019, 10:01 ABŞ Azərbaycana QADAĞA qoya bilər   19 May 2019, 09:53 Bakıda ana və azyaşlı qızı itkin düşdü 19 May 2019, 09:33 Bu gün II və III qrupları üzrə qəbul imtahanı keçirilir 19 May 2019, 08:52 Bakıda 77 yaşlı qadın yanğında öldü 19 May 2019, 00:49 Elektron sənədlərin qeydə alınması proseduru dəyişib 19 May 2019, 00:33 Helikopter qəzasında iki nəfər öldü 19 May 2019, 00:14 “Avropa Birliyi Azırbaycanla əməkdaşlıqda maraqlıdır” - Sona Əliyeva 18 May 2019, 23:57 “Zağulba Mall”da yanğın söndürüldü – Rəsmi 18 May 2019, 23:29 “Eurovision 2019” müsabiqəsi başa çatdı - Niderland təmsilçisi qalib olub 18 May 2019, 23:09 İnam Kərimov Goranboyda  fermerləri dinlədi - FOTO 18 May 2019, 22:53 Zağulbadakı yanğında 2 FHN əməkdaşı xəsarət aldı 18 May 2019, 22:36 Neft hasilatının azaldılması üzrə OPEK+ razılaşmasının müddəti uzadılır 18 May 2019, 22:12 Çingiz Mustafayevdən dünya azərbaycanlılarına müraciət - VİDEO 18 May 2019, 21:49 Qum fırtınası səbəbindən şagirdlər təxliyə edildi 18 May 2019, 21:28 Azyaşlı yol qəzasının qurbanı oldu 18 May 2019, 21:07 Bakıda ticarət mərkəzində yanğın: Xəsarət alanlar var - VİDEO 18 May 2019, 20:47 Penitensiar Xidmət təkzib etdi: Cərimə təcridxanasında deyil 18 May 2019, 20:32 Oqtay Əsədov Zelenskinin andiçmə mərasiminə qatılacaq 18 May 2019, 20:18 İranda qadın futbolçular bunu da etdi - FOTOLAR 18 May 2019, 20:00 İlham Əliyev kamerunlu həmkarını təbrik etdi   18 May 2019, 17:25 Xalq yazıçısı Hüseyn İbrahimovun 100 illiyi qeyd ediləcək 18 May 2019, 17:01 Prezident icra başçısı ilə bağlı sərəncam imzaladı 18 May 2019, 16:59 Jurnalist Fuad Abbasov Moskvada saxlanıldı - deportasiya edilir  18 May 2019, 16:54  “Komandir” Ağdamda - FOTOLAR 18 May 2019, 16:42 Koçaryan azadlığa buraxıldı 18 May 2019, 16:33 Qlobal Jurnalistlər Birliyi: Akkreditasiya problemləri həll ediləcək 18 May 2019, 16:11 “Nə yaxşı görüşdük, nə yaxşı yenə” – Ənvər Rza anıldı - VİDEO 18 May 2019, 16:03 “Azərbaycana qarşı təzyiq mexanizmi işə salmağa  çalışırlar”- Sevinc Fətəliyeva 18 May 2019, 15:37 Axtarışda olan 28 nəfər saxlanıldı 18 May 2019, 15:15 Dövlət Komitəsində Laçının işğalı anıldı 18 May 2019, 15:10 İranda 5 bala yaxın zəlzələ oldu 18 May 2019, 14:40 Deputat Pərvin Kərimzadə Azərbaycan-Avropa İttifaqı əlaqələrini şərh etdi 18 May 2019, 14:29