Modern.az

Deputatlar da cangüdən saxlayırlarmı....  

Deputatlar da cangüdən saxlayırlarmı....   

Parlament

7 İyul 2018, 09:25

Cangüdənlik müasir dövrdə özünü təsdiqləmiş peşədir. Azərbaycanda da cangüdənlə gəzən vəzifə adamları, imkanlı şəxslər az deyil. Bu sırada siyasətçilər, müğənnilər, məmurlar, rektorlar, iş adamları çoxdur. Bir sıra şəxslər də var ki, onlar  özlərinə imic formalaşdırmaq məqsədilə cangüdən tuturlar.

İyul ayının 3-də Gəncə Şəhər İcra Hakimiyyətinin başçısı Elmar Vəliyevin və onun mühafizəçisi Qasım Aşbazovun silahlı hücuma məruz qalması cangüdən mövzusunu bir xeyli aktuallaşdırıb. Yeri gəlmişkən, Milli Məclisdə təmsil olunan bir neçə deputatın da cangüdəni var.


Bəs digərləri?..  Elmar Vəliyev olayından sonra onlar da özlərinə cangüdən tutmaq haqda düşünüblərmi?...


Modern.az saytının əməkdaşı mövzuyla bağlı bir neçə deputatın fikrini öyrənib.

 

Milli Məclisin Aqrar siyasət komitəsinin sədri Eldar İbrahimov heç vaxt cangüdəndən istifadə etmədiyini və indi də bu haqda düşünmədiyini deyib:

“Mənim əlimdə imkan olan zaman ancaq kiməsə köməklik etmişəm. Kiminləsə ədavətim olmadığına görə də cangüdənə ehtiyacım yoxdur.  Nə də cangüdəni saxlamağa imkanım var. Mən dükana, bazara və ürəyim istədiyi yerə rahat şəkildə gedə bilirəm. İnanmıram ki, kimsə mənə nəsə etmək istəsin, mən də cangüdən saxlayım. Hər zaman xalqın arasında olan biriyəm. Elə bilirəm ki, hamı məni çox istəyir. Xüsusilə də kənd adamları. Bu günə kimi heç kəsə sataşmamışam, bir söz belə deməmişəm. Hər zaman çalışmışam ki, deputat seçildiyim bölgədə, yaşadığım ərazidə, ümumiyyətlə insanlarımız arasında hörmət-izzət qazanım. Şükürlər olsun ki,  bu hörməti qazanmışam. Ona görə də mənim cangüdənlə gəzməyə zərrə qədər ehtiyacım yoxdur”

 

Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov vaxtilə yüksək vəzifələrdə işləsə də, heüç vaxt cangüdəndən istifadə etməyib.

 

“Mən ən çətin vaxtlarda, 1992-1993-cü illərdə Baş nazirin birinci müavini işləmişəm. Ancaq heç vaxt da cangüdəndən istifadə etməmişəm. Çünki həmişə xalqın arasında olmuşam. Mənim xalqdan gizli heç nəyim yoxdur. İnsanlara yaxın olmaq, onların dərdini dinləyib, problemnlərinə köməklik etmək lazımdır”.

 

Deputat bildirib ki, bu gün bəzi məmurlar öz işləriylə məşğuldur, nəinki dövlətin işləriylə:

 

“Qanuna əsasən, 3 şəxs dövlət hesabına cangüdəndən istifadə edə bilər.  Bunlar Prezident, Baş nazir və Milli Məclisin sədridir.  Qalan şəxslər hansı pulun hesabına cangüdəni saxlayırlar? Ümumiyyətlə, bunların hamısı qeyri-qanuni hərəkətlərdir”.

 

Milli Məclisin Hüquq siyasəti və dövlət qurucuuluğu komitəsinin üzvü Fəzail Ağamalı vaxtilə cangüdəndən istifadə etdiyini bildirib.

 

“Əvvəla, insana verilən ömrü Allah alır. İkinci tərəfdən isə mən elə bir əməlin sahibi deyiləm ki, cangüdənlərlə gəzim.  Bir ara istisna olunmaqla. Keçmiş deputat Hüseyn Abdullayevlə aramızda problem yaranan zaman özüm şəxsən Daxili İşlər Nazirliyinə müraciət etdim ki, mənim təhlükəsizliyim təmin olunsun. Çünki Hüseyn Abdullayevin ətrafında quldur dəstəsi vardı. O, hər şeyə əl ata bilərdi. Haradasa 2 aya yaxın Çevik Polis Alayı tərəfindən mən mühafizə olundum. Vəssalam. Bir də 1990-cı illərin əvvəllərində  hadisələrin gərgin vaxtında partiyadaşlarımın çox böyük təkidi ilə 10-15 gün hara getmişəmsə, partiya üzvlərinin bir neçəsi məni müşayiət edib”.

 

Deputat deyib ki, kimsə adamın qəsdinə dayanıbsa,1 və 2 cangüdənlə canını qoruya bilməz:

 

“Mərhum prezident Heydər Əliyevin həyata keçirmiş olduğu cinayətkarlığa qarşı sərt mübarizə, daxili işlər orqanlarının peşəkar fəaliyyəti nəticəsində 1990-cı illərn sonundan başlayaraq Azərbaycanda  cangüdənlə gəzməyə ehtiyac görülmədi. Bu gün də ölkəmizdə cangüdəndən istifadə etməyə ehtiyac yoxdur. Ona görə də mən nə silah, nə də cangüdən gəzdirməyə ehtiyac duyuram”.

 

Milli Məclisin İnsan hüquqları komitəsinin üzvü Tahir Kərimli də vaxtilə cangüdəndən istifadə edib.

 

“Azərbaycan Xalq Cəbhəsi hərəkatı yarananda İsmayıllıda hakim işləyirdim. O zaman mənə Əliheydər adlı şəxsi cangüdən ayırmışdılar. Bunu mənə qərarla İsmayıllıdakı xalq hərəkatı ayırmışdı. Hətta həmin şəxs Ali Məhkəmədə işləyəndə də məni müşayiət etdi.
Vəhdət Partiyası yarananda da Zahid adlı şəxs könüllü olaraq mənə cangüdənlik edirdi.  Mən o zaman cangüdəndən mitinqlər zamanı istifadə edirdim. Adi vaxtlarda isə heç vaxt cangüdəndən istifadə etməmişəm. Onlara isə əməkhaqqı verməmişəm. İndi isə cangüdənim yoxdur və ehtiyac belə duymuram. Bu gün mən işə piyada gəlmişəm”.

Whatsapp
Bizə yazın!
Keçid et
Ukraynadan Rusiyaya ardıcıl zərbələr: Vəziyyət kritikdir