Modern.az

Teatrımızın bahadırı  

Teatrımızın bahadırı   

14 Yanvar 2019, 12:28

Elə sənətkarlar var ki, biz onları görməyi həmişə arzulayır, bu günündən, sabahından nigaran qalırıq. Belə aktyorlardan biri də xalq artisti Yasin Qarayevdir... 

O, bizim uşaqlıq illərimizin qəhrəmanı, teatrımızın bahadırlarından biridir. Bir vaxtlar "sehirli qutu"da tez-tez görünərdi. Rol aldığı tamaşaları xüsusi maraqla izləyərdik. Amma son vaxtlar nədənsə araya-ərsəyə çıxmır, tamaşaçılarını intizarda saxlayır…

Yaşı elə də çox deyil, bir də ki, aktyor üçün nə yaş, o qədər filmlərimizdə onun yaşına uyğun rollar var ki, nədənsə rejissorlar belə teatr bahadırlarının yerinə həvəskar aktyorları çəkirlər. Bəlkə də elə buna görədir ki, filmlərimiz Yalamadan o tərəfə gedib çıxa bilmir…

O, 1946-cı ildə Şəmkir rayonunun Qapanlı kəndində dünyaya gəlib. 1973-cü ildə Azərbaycan Dövlət İncəsənət İnstitutunun musiqili komediya fakültəsini bitirib. 1974-cü ildən Azərbaycan Dövlət Gənc Tamaşaçılar Teatrında çalışıb.

1991-ci ildə əməkdar artist, 2006-cı ildə isə xalq artisti fəxri adlarına layiq görülüb. Bir neçə dəfə prezident mükafatçısı olub. 2016-cı ildə Azərbaycan Teatr Xadimləri İttifaqının "Sənətkar" medalı ilə təltif edilib. 

2016-cı ildən Azərbaycan Respublikası Prezidentinin fərdi təqaüdünü alır…

Deyir ki, “Müslüm Maqomayev qədər sevdiyim, pərəstişkarı olduğum ikinçi bir estrada müğənnisi tanımıram. Uşaqlığ çağlarımdan həmişə onun ecazkar və bənzərsiz səsinin pərəstişkarı olmuşam. Mənim fikrimcə Tanrı bütün gözəllikləri ona vermişdi. Güclü, məlahətli səs, boy-buxun, səhnə yaraşığı, jest, plastika və çox şey. Müslümü bircə dəfə dinləyən tamaşaçı onun sehirli səsinin tilsiminə düşməyə bilməzdi. Tanrı ona dünya estrada musiqisinin imperatoru kimi yüksək bir zirvə bəxş etmişdi. Və o da sonuncu imperator olduğu üçün həmin titulu özü ilə Tanırının yanına apardı”…

…Yasin Qarayev- layiqli adamlar haqında xoş söz deməyə tələsən insan. Xeyirxahlıqda xəsis olmayan, abırına sığınıb dünyanın gərdişini səbrlə seyr edən görkəmli şəxsiyyət…

...Ürəklərdə yuva qurmağı bacaran şəxsin həyatda yaşamağa haqqı var. Allah ömrünüzü uzun eləsin!…


Elman Eldaroğlu,
ABŞ, Miçiqan

Twitter
Sizə yeni tvit var
Keçid et
Ukraynadan Rusiyaya ardıcıl zərbələr: Vəziyyət kritikdir