“Azərbaycan Respublikasının Prezidenti cənab İlham Əliyevin 6 fevral 2019-cu il tarixli Fərmanı əsasında Beynəlxalq Münasibətlərin Təhlili Mərkəzi yaradılıb. Prezidentin 19 fevral 2019-cu il tarixli sərəncamı ilə həmin Mərkəzin İdarə Heyətinin sədri vəzifəsinə təyin edilmişəm. Bildirmək istərdim ki, hal-hazırda Mərkəz öz fəaliyyəti ilə bağlı qeydiyyat və inzibati məsələlərinin həlli mərhələsindədir”.
Modern.az-ın məlumatına görə, bunu Beynəlxalq Münasibətlərin Təhlili Mərkəzi İdarə Heyətinin sədri Fərid Şəfiyev deyib.
O bildirib ki, qeydiyyat və inzibati məsələlərinin həlli mərhələsi yekunlaşdıqdan sonra Mərkəz tam fəaliyyət göstərəcək:
“Sənədləşmə işləri başa çatdıqdan sonra gələcək fəaliyyət istiqamətlərimiz barədə geniş ictimaiyyət məlumatlandırılacaq. Bütün həmkarlarıma və dostlarıma ünvanladıqları təbriklərə və Mərkəzin fəaliyyəti ilə bağlı göstərilən böyük marağa görə təşəkkürümü bildirirəm”.
