“NATO Gürcüstan məsələsində Rusiya ilə kompromisə getməyə hazır deyil”. Modern.az-ın “İnterfaks”a istinadən yaydığı məlumata əsasən bu barədə alyansın baş katibi Anders Foq Rasmussen bəyan edib. "Yox, heç bir halda biz prinsipial məsələlərdə kompromisə getməyəcəyik" -deyə o, bu gün “İnterfaks”ın mərkəzi ofisində keçirdiyi mətbuat konfransında bildirib.
Rasmussen qeyd edib ki, Moskvada Rusiya rəhbərliyi ilə söhbətdə Gürcüstanın ərazi bütövlüyü və suverenliyinə hörmət edilməsinin vacibliyini deyib.
“Mən rəsmən bəyan etdim ki, NATO Gürcüstanın ərazi bütövlüyü hüququna tam əməl edilməsində israrlıdır”-deyə NATO baş katibi bildirib.
Eyni zamanda A.F.Rasmussen Rusiya ilə NATO arasında əməkdaşlığın vacibliyini qeyd edib.
"Düşünürəm ki, hər iki tərəf gözəl anlayır ki, hazırki şəraitdə biz yeni təhdidlərlə qarşıdurmada birgə işləməliyik" - deyə NATO baş katibi vurğulayıb.