Ölkəmizə yay fəsli daxil olandan havaların temperaturu da yüksəlib. Son bir neçə gündə ölkə ərazisində temepratur xeyli artıb.
Maraqlıdır, havaların bu cür isti keçməsi iyun ayı üçün normaldırmı?
Azərbaycan Milli Elmlər Akademiyasının Coğrafiya İnstitutunun direktor müavini, coğrafiya üzrə fəlsəfə doktoru Məhərrəm Həsənov Modern.az-a açıqlamasında mövzu barədə danışıb.
“Havaların bu dərəcədə isti keçməsi normadan artıqdır. Belə ki, 1961-1990-cı illərə aid olan və beynəlxalq aləmdə qəbul olunmuş normativ rəqəmdən təqribən 3-4 dərəcə yüksəkdir. Tempratur bir az yüksək müşahidə edilir. Güman ki, bu qaydada bir neçə neçə gün də davam edəcək. İyul və avqust aylarında da normadan 3-4 dərəcə yüksəlməklə eyni qaydada davam edəcək”.
Məhərrəm Həsənovun həmçinin Azərbaycanda ən isti və sərin bölgələr barədə də danışıb:
“Ən isti bölgə dedikdə mütləq maksimum temperatur nəzərdə tutulur ki, bu da 2000-ci ildə iyun ayında Naxçıvanda müsbət 46 dərəcə müşahidə olunub. O vaxta qədər isə müsbət 44 dərəcə Culfada müşahidə edilmişdi”.
Azərbaycanın ən sərin bölgələrindən danışarkən Məhərrəm Həsənov konkret bölgə adı çəkməkdə çətinlik çəkdiyini bildirib:
“Ümumiyyətlə dağlıq rayonlarımızın hamısı sərindir. Sadəcə sərin rayonlarımızın bir neçəsinin adını sadalaya bilərik ki, buraya Qusar, Kəlbəcər, Gədəbəy, Zaqatala, İsmayıllı rayonunun dağlıq hissələri və s. aid edilir. Ən isti bölgələrimizə Kürdəmir, qeyd etdiyim kimi Naxçıvan, Culfanı göstərə bilərik, amma ən sərin bölgəmizi konkret olaraq bildirmək çətindir”.
Nuranə DAXİLQIZI