Bu gün Azərbaycanın sabiq prezidenti, mərhum Əbülfəz Elçibəyin doğum günüdür.
Əbülfəz Qədirqulu oğlu Əliyev (Elçibəy) 1938-ci il iyunun 24-də Ordubad rayonunun Kələki kəndində anadan olub. 1992-93-cü illərdə Azərbaycan Respublikasının prezidenti olub. Elçibəy 22 avqust 2000 -ci ildə Türkiyədə vəfat edib. Bakıdakı Fəxri Xiyabanda dəfn olunub.
Modern.az saytı Elçibəyin oğlu Ərturqut Əliyevlə əlaqə saxlayaraq mərhum eks-prezidentin doğum günləri keçirməklə bağlı düşüncələrini öyrənməyə çalışıb.
Ərturqut Əliyev bildirib ki, onların ailəsində həmişə doğum günləri keçirilib:
“Rəhmətlik atam doğum günlərini keçirməyi çox sevirdi. Təbii, bunu ancaq ailə daxilində edərdik. Təmtəraqlı ad günləri keçirməyi atam heç vaxt sevməyib. Düzdü, uşaq olduğumdan atamın ad günləri ilə bağlı daha dəqiq məlumat verə bilmirəm. Çünki evimizə kimlərin gəldiyini tam xatırlaya bilmirəm”.
Ərturqut Əliyev atasının doğum günlərində hədiyyə almaq məsələsindən xəbərdar olmadığını deyib:
“Doğum günlərində atamın hədiyyə qəbul etməyi sevib-sevmədiyini deyə bilmərəm. Çünki bu məsələlər yadımda deyil”.
Ərturqut Əliyev hazırda Bakıda olduğunu və atasının məzarını ziyarət etdiyini də vurğulayıb.
Əbülfəz Qədirqulu oğlu Əliyev (Elçibəy) 1938-ci il iyunun 24-də Ordubad rayonunun Kələki kəndində anadan olub. 1957 -1962-ci illərdə Bakı Düvlət Universitetinin Şərqşünaslıq fakültəsinin ərəb filologiyası şöbəsində təhsil alıb.
Sonra SSRİ Hidrolayihə İnstitutunun Bakı şöbəsində tərcüməçi işləyib. Misir Ərəb Respublikasına göndərilən Əbülfəz bəy Əsvan bəndinin tikintisində tərcüməçi kimi çalışıb (yanvar 1963 - oktyabr 1964). Xarici ezamiyyətdən dönərək 1965 –ci ildə BDU-nun aspiranturasına daxil olub və aspirantura təhsilini 1968-ci ildə uğurla tamamlayıb. 1975-ci ilin yanvarında Azərbaycan Dövlət Təhlükəsizlik Komitəsi onu tələbələr arasında millətçi və antisovet təbliğatı aparmaq adıyla həbs edib və 17 iyul 1976-cı ilədək siyasi dustaq olaraq azadlıqdan məhrum olunub. Əsasən Qaradağ daş karxanasında ağır fiziki işlərə məhkum edilib. Həbsdən buraxıldıqdan sonra Əbülfəz bəy bir müddət işsiz qalıb. 1976-cı ilin dekabrında Azərbaycan Milli Elmlər Akademiyası Əlyazmalar İnstitutunda kiçik elmi işçi kimi elmi fəaliyyətə başlayıb. Sonralar böyük elmi işçi, şöbə müdiri, aparıcı elmi işçi elmi rütbə və vəzifələrə qədər yüksəlib. Elçibəy 1988-ci ildən sonra alovlanan milli-azadlıq hərəkatının önündə gedib.
1992-93-cü illərdə Azərbaycan Respublikasının prezidenti olub. Elçibəy 22 avqust 2000 -ci ildə Türkiyədə vəfat edib. Bakıdakı Fəxri Xiyabanda dəfn olunub.
