Yeni Azərbaycan Partiyasının təşkil etdiyi “Gənc liderlər üçün yay məktəbləri”nin ikinci turu çərçivəsində iyulun 17-də gənclər Lerik rayonu ilə tanış olublar.
Modern.az xəbər verir ki, əvvəlcə gənclər rayonun mərkəzində Şəhidlər Kompleksini ziyarət ediblər.
Məlumat verilib ki, Ermənistan-Azərbaycan Dağlıq Qarabağ münaqişəsində Lerik rayonu 140 şəhid verib. Onların 5-i şücaətlərinə görə Milli Qəhrəman adına layiq görülüblər. Azərbaycanın ilk Milli qəhrəmanları sırasında da leriklilərin adı var. Rayonda hazırda 80 nəfər Qarabağ əlili var.
Sonra ümummilli lider Heydər Əliyevin rayon mərkəzində ucaldılmış abidəsini ziyarət edən gənclər Ulu Öndərin əziz xatirəsini ehtiramla anıb, abidəsi önünə gül düzüblər.
Daha sonra gənclər Uzunömürlülər, Bayraq və Tarix-diyarşünaslıq muzeyləri, Heydər Əliyev Mərkəzi ilə tanış olublar.
Gənclər günün ikinci yarısında “Yaradıcı gənclərin inkişafına dövlət dəstəyi” mövzusunda təlimdə iştirak ediblər.
YAP Gənclər Birliyi ofisinin əlaqələndiricisi Elmar Məmmədov təlimin mövzusu və faydaları barədə məlumat verib.
Təlim iştirakçılarına Milli Məclisin deputatları İqbal Məmmədov və Sevin Hüseynova, Lerik rayon İcra Hakimiyyəti başçısının birinci müavini Cəlil Baxşiyev və Lerik Rayon Mərkəzi Xəstəxananın baş həkimi, tibb elmləri üzrə fəlsəfə doktoru Mübariz Ağayev layihənin əhəmiyyətindən, gənclərin bilik və bacarıqlarının artırılmasında rolundan geniş bəhs ediblər.
Bildiriblər ki, YAP rəhbərliyi gənclərin siyasi fəallığının artırılması, asudə vaxtlarının səmərəli təşkili, beynəlxalq əlaqələrin genişlənməsi, ümumiyyətlə, ayrı-ayrı sahələr üzrə müxtəlif layihələrin həyata keçirilməsinə xüsusi diqqət yetirir.
Sonra təlimin moderatoru, YAP Binəqədi rayon təşkilatının baş təlimatçısı Kübra Əliyarlı yaradıcı gənclərə göstərilən dövlət qayğısından bəhs edib.
Sonda gənclərin sualları cavablandırılıb.
Tanışlıq və təlimlərdən sonra gənclər arasında müxtəlif idman yarışları, yaradıcı müsabiqələr keçirilib.
