Nigar Həsənzadənin ədəbi layihəsi olan “Söz” sözümüzü hər dildə, hər ağızda şirin edib. Təsadüfi deyil ki, İmadəddin Nəsimin 650 illik yubiley tədbirləri çərçivəsində Nəsimi SÖZünü də çox fərqli platformalarda, fərqli səhnələrdə, fərqli üslubda təqdim etdi. Nigar Həsənzadənin “SÖZ”ü sözə dəyər verən, “SÖZ”ü deyə bilməyə imkanı olmayanların yanındadır. Cəmiyyətdə sağlam, əlli-ayaqlı insanlarımız olduğu kimi, hərəkət məhdudiyyəti, müxtəlif dərəcədə əllilliyi olan insanlar var ki, onlar sevdikləri sözlərini danışmaq üçün, söyləmək üçün sıxılar, kompleksə girərlər.
Bax, o Nigar , həmin onların yanındadır. Söz içərisindən söz seçərək, sözə aşiqləri bir məkana toplayıb, hər kəsi SÖZ-ün sehrinə salmağı bacarır Nigar.
Laməkan Nəsiminin yurdu Şamaxıda Nəsimi sözünün başına pərvanə kimi dolandıq. Dünyanın müxtəlif ölkələrindən Nəsimi sözünün sehrinə gələn qonaqlara Müqəddəs Şamaxıda sözün necə yaranmasını göstərdi “SÖZ”-çülər.
İmaddədin Nəsimi ili ölkəmizdə kitaba, kəlama, sözə, yazıçıya olan münasibəti dəyişdi. Kitab festivalında gənc yazarlarımızın könül bağlamalarını Heydər Əliyev Fondu və Mədəniyyət Nazirliyinin dəstəyi ilə “SÖZ”ün rəhbəri Nigar Həsənzadə fərqli formatda təqdim etdi. Şəhriyar Del Gerani yenə sözə biət etməyi, sözün qarşısında əyilib ibadət etməyi sübut etdi. Mehman Rəsulov çoxlarının unutduğu Nüsrət Kəsəmənlinin nəfəsini gətirdi SÖZ süfrəsinə... Və bu seçimlərin, bu quruluşların hər birinin arxasında o göyçək və incə məxluq—Nigar Həsənzadə var idi.
Nəsimi ruhunun hakimliyindən idi ki, dünyanı son illərdə mat qoyan, Qızıl medallı Varis Yolçuyevin uğuru olan IV Beynəlxalq Avrasiya materikinin ədəbiyyat üzrə 4-cü "LiFFt" festivallar festivalı Vətənimizdə keçirildi. Dünyanın 52 ölkəsindən 150 yazarın qatıldığı festivalda müxtəlif nomonasiyalarda mükafatlanan 30 azərbaycanlı yazar arasında SÖZ-ün də üzvləri var idi.
Nigar Həsənzadənin layihələri çərçivəsində dünən gecə Bakı Kitab Mərkəzində “Sevginin dili yoxdur” adlı eşitmə məhdudiyyətli oxucularla tanınmış şairlərin görüşü keçirildi.
Siz heç ömrünüzdə bir dəfə eşitmə, görmə məhdudiyyəti olan insanlardan şer haqqında soruşmusunuz? Yəqin yox.
Lakin “SÖZ” ədəbi layihəsinə həyat verdiyi gündən Nigar Həsənzadə hər zaman məhdudiyyətli istedadların yanında oldu. Onlar üçün təşkil etdiyi gecələrdə Heydər Əliyev Fondunun vitse prezidenti, şairə Leyla xanım Əliyevanı da məclislərin başına gətirdi. Cəmiyyətdə özlərinə komfort tapa bilməyən məhdudiyyətli yazarlarımız Nigar xanımın və Leyla xanımın şer və söz məclislərində özlərini çox rahat hiss etdilər. Könüllərindəki SÖZ-lərini Tanrı yüksəkliyinə qaldırdılar.
Dünən axşam da belə oldu. Eşitmə məhdudiyyətli gənclərə jest dili ilə Nəsiminin, Nəriman Həsənzadənin, Fikrət Qocanın, Leyla Əliyevanın şerlərini oxudu gənclər. Eşitmə və danışma məhdudiyyəti olan yazarlarımız, söz demək istəyənlərimiz özləri də fürsətdən yaralanıb jest dili ilə şer söylədilər.
Eşitmə və danışma məhdudiyyəti olan gənclərin şer göstərməsindən təsirlənən Fikrət Qoca onlara dəstək olmaq üçün dedi ki, “ay mənim balalarım, mənim də səsim çıxmır. Çoxdan batıb. Əslində hər sözü danışmaqdansa danışmamaq daha yaxşıdır. Əslində nə yaxşı ki, pis sözləri, pis fikirləri siz eşitmirsiniz. Sizin qəlbiniz o pis sözlərdən çirklənməyib”. Nəriman Həsənzadə qayğıya və sevgiyə daha çox ehtiyacı olan gənclərə göstərilən bu qayğıdan duyğulandığını söylədi.
Nigar Həsənzadənin könlünün “SÖZ”ü olan “Sevginin dili yoxdur” poeziya gecəsi neçə-neçə bizdən ayrı yaşayan gənci bizə qaytardı. Onlara güvən verdi, onları SÖZ-ün sehrinə saldı.
Sevgi gecəsinin sonunda Nigar xanım bir söz də dedi: “ Hazırda Azərbaycanda heç bir universitetdə "Jest dili" mütəxəssisləri yetişdirən fakültələr yoxdur. Belə bir ixtisasın mövcud olmaması jest dilinin ölkəmizdə təbliğatının, inkişafının qarşısını alır. Məhdudiyyətli dostlarımızın da təhsil almasında ciddi problemlər var. Çox az hallarda təhsil alanlar da iş tapa bilmirlər. Biz cəmiyyət olaraq onların sosiallaşmasına dəstək olmalıyıq”.
Aida Eyvazlı