Bu il analığın qorunması, qadın sağlamlığı və reproduktiv sağlamlıq problemi dünyanin bir sıra nüfuzlu beynəlxalq təşkilatlarının müzakirə mövzusu kimi gündəmdədir. İslam Konfransı Təşkilatı çərçivəsində Tunisdə, Dünya Parlament İttifaqının Baş Məclisinin Uqandada və Avropa Parlament Forumunun İstanbulda keçirilməsi nəzərdə tutulan konfranslarının gündəliyi məhz bu məsələyə həsr olunub. Bu konfranslarda dünyanın fərqli ölkələrindən dəvət edilmiş parlamentarilər və qeyri-hökumət təşkilatlarının iştirakı nəzərdə tutulub.
Məqsəd Minilliyiyin İnkişaf Strategiyasının yerinə yetirilməsində ictimaiyyətin və siyasətçilərin diqqətini cəlb edərək, onların bu məsələdə rolunu artırmaqdır.
Bu məqsədlə də “Lider” Qadınlar İctimai Birliyinin təşəbbüsü və Azərbaycan Tibb Universitetinin, Türkiyənin Qadın Sağlıqçılar və Beynəlxalq Yerüzü Doktorlar Təşkilatlarının dəstəyi ilə “Analığın qorunması minilliyin ən əsas məqsədidir: Repoduktiv sağlamlıq və bioetika” mövzusunda konfrans keçirilməsi planlaşdırılıb. Konfrans 12-13 Mart 2012-ci il tarixində keçiriləcək. Bu barədə Modern.az-a Lider” Qadınlar İctimai Birliyinin sədri Məlahət İbrahimqızı məlumat verib.
“Lider” Qadınlar İctimai Birliyi tərəfindən dəvət olunmuş qonaqlara - nümayəndə heyətinə tanınmış ictimaiyyətçi və dünyanın ən ağır və fövqaladə vəziyyətli ölkələrində qadınlara tibbi və hamanitar fəaliyyət göstərən Sara Davudoglu rəhbərlik edir. Sara Davudoğlu Türkiyə xarici işlər nazirinin həyat yoldaşıdır.
Modern.az