Aprelin 4-də Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli və Şimali Kipr Türk Cümhuriyyətinin Bakı nümayəndəliyinin rəhbəri Zəki Qazioğlu arasında görüş keçirilib.
Fondun icraçı direktoru tarixi tellərlə bir-birinə bağlı olan Azərbaycan Respublikası ilə Şimali Kipr Türk Cümhuriyyəti arasında əlaqələrin son illərdə bütün sahələrdə sürətlə inkişaf etdiyini, münasibətlərdə keyfiyyətcə yeni mərhələnin yarandığını razılıqla qeyd edib. Qarşılıqlı faydalı əlaqələrin təkcə iqtisadi-siyasi deyil, həm də mədəni-humanitar sahələrdə uğurla inkişaf etdiyini deyən Vüqar Səfərli hazırkı şəraitdə iki ölkənin kütləvi informasiya vasitələri arasında da əməkdaşlığın genişləndirilməsi zərurətini önə çəkib. İcrası direktor Fondun təşkilatçılığı ilə Azərbaycanın aparıcı kütləvi informasiya vasitələrinin əməkdaşlarından ibarət 15 nəfərlik heyətin 2010-ci ildə Şimali Kipr Türk Cümhuriyyyətinə səfər etdiyini xatırladıb, belə layihələrin gələcəkdə də davam etdirilməsinə ehtiyac olduğunu deyib.