Daxili İşlər Nazirliyinin Baş İctimai Təhlükəsizlik İdarəsinin rəis müavini Əziz Baqişev Masazırdakı postun hansı səbəblə qurulduğunu açıqlayıb.

Modern.az xəbər verir ki, bu barədə İctimai Televizyanın efirində çıxış edərkən deyib ki, Masazırda postun qurulmasında, avtomobillərin saxlanılmasında məqsəd lüzumsuz yerə öz avtomobili ilə şəhərə çıxanları müəyyən etməkdir:

“Bakı, Sumqayıt, Abşeron şəhərləri daxilində avtomobillərin hərəkəti sərbəstdir. Bu, həmin şəxslərin avtomobilini və ya özünü evə qaytarmaq məqsədi daşıyır. Bu məqsədlə postlar fəaliyyət göstərir”.

Ə.Baqişev deyib ki, hazırda qaydaları pozanlar daha çox Bakı şəhərindədir: 

“Nəqliyyat vasitələrinin hərəkəti bacardıqca məhdudlaşdırılır. Vətəndaşın işə getməyə icazəsi varsa, o avtomobili ilə işə gedə bilər. Amma çalışdığımız qədər nəqliyyat vasitələrinin hərəkətini məhdudlaşdırırıq. Tövsiyə edirik ki, işə gedərkən digər nəqliyyat vasitələrindən istifadə etsinlər. İctimai nəqliyyatdan istifadə də təhlükəlidir. Təhlükə hər yerdə var. Heç kim bu təhlükədən sığortalanmayıb. Bu virus təhlükəlidir. Biz hamımız bir yerdə karantin rejiminə ciddi əməl etməklə vətəndaşların dövlətlə münasibətini tənzimləməklə hamımız birgə bu bəladan qurtula bilərik”.