Modern.az

“1 DONOR 2 HƏYAT” - Deputatdan qanvermə aksiyasına ÇAĞIRIŞ

“1 DONOR 2 HƏYAT” - Deputatdan qanvermə aksiyasına ÇAĞIRIŞ

Aktual

8 Aprel 2020, 15:22

Milli Məclisin deputatı Könül Nurullayeva xeyirxah təşəbbüslə çıxış edib.

 

Modern.az-ın məlumatına görə, karantin dövründə Qan Bankına müraciətlərin kəskin azalmasını xatırladan millət vəkili talassemiya və hemofiliyalı xəstələrə dəstək verməyin vacibliyini vurğulayıb. Bununla bağlı müraciətdə deyilir:

 

“Dəyərli Nizami rayon sakinləri və həmvətənlərim, bildiyiniz kimi Ümumdünya Səhiyyə Təşkilatının qərar və tövsiyələrinə uyğun olaraq, ölkəmizdə koronavirus infeksiyasının yarada biləcəyi təhlükənin qarşısının alınması məqsədilə epidemioloji, tibbi-profilaktik və müalicə tədbirlərinin həyata keçirilməsi üçün qəbul edilən qərarlar və onların operativ həyata keçirilməsi sahəsində dövlətimiz tərəfindən əhəmiyyətli işlər görülür. İnsanların karantin dövründə hərəkətində olan məhdudiyyətləri və sağlamlığının təhlükəsizliyini nəzərə alaraq, Qan bankına könüllü qan vermək istəyində olan müraciətlərin sayı nəzərə çarpacaq şəkildə azalıb”.

 

K.Nurullayeva eyni zamanda, ölkəmizdə talassemiya və hemofiliyalı xəstələrə dövlət tərəfindən xüsusi qayğı və diqqətin göstərildiyini vurğulayıb:

 

“Bu çətin dövr ərzində Heydər Əliyev Fondunun humanist çağırışına cavab olaraq, qeydiyyata alınmış və hər ay qan köçürülməsinə ehtiyacı olan uşaqlara dəstək vermək, onların risk qrupuna aid olduqlarını nəzərə alaraq tədarük edilən qan ehtiyatını artırmaq məqsədilə “1 DONOR 2 HƏYAT” adlı qanvermə aksiyasına start veririk. Xüsusi karantin dövründə donorların Milli Hematologiya və Transfuziologiya Mərkəzinə təhlükəsiz şəkildə çatdırılmasını təmin edəcəyik”.

 

Deputat daha sonra hər kəsdən qana ehtiyacı olan uşaqlara yardım etmək məqsədilə bu humanist aksiyada könüllü iştirak edərək, həmrəylik və birlik nümayiş etdirmələrini xahiş edib.

 

Xatırladaq ki, könüllü olaraq aksiyada iştirak etmək istəyən vətəndaşlar “Deputat Qərargahında” yaradılmış İşçi Qrupu ilə əlaqə saxlaya bilərlər.

Tel: (İş: 012 422 22 41, mob: 055 276 23 75)

Instagram
Gündəmdən xəbəriniz olsun!
Keçid et
Ukrayna ordusu dəhşət saçdı: Rusiya ərazisi vuruldu