Hazırda Bəhramın vəziyyəti ağır olaraq qalır, heç bir dəyişiklik yoxdur.

Bunu Modern.az-a açıqlamasında Əməkdar artist Bəhram Bağırzadənin həyat yoldaşı Şəhla Bağırzadə deyib.

Ş.Bağırzadə reanimasiyada yatan həyat yoldaşına orqan transplantasiyası edilməsinin müzakirə olunmadığını deyib:

“Bəhram hazırda reanimasiyadadır, vəziyyəti ağırdır, virusa görə yanına heç kim buraxılmır. Ağciyər transplanatsiyası söhbəti isə absurddur, koronalı xəstəni isə heç kim əməliyyat etməyib. Bunlar boş söhbətlərdir. Bilmirəm bunu kim, hardan, necə yayır, ümumiyyətlə belə bir şey yoxdur. Türkiyəyə aparılması da müzakirə olunmur. Burda həkimlər əllərindən gələn hər şeyi edirlər”.

O qeyd edib ki, viruslu xəstəyə dünyanın heç bir yerində orqan transplantasiyası edilmir:

“Sadəcə müalicə olunur. Kimlərsə sosial şəbəkələrdə nəsə yazır. Öz işini görür. Mənə onlar maraqlı deyil”.

Qeyd edək ki, Azərbaycanın əməkdar artisti Bəhram Bağırzadə koronavirus infeksiyasına yoluxub. O, vəziyyətinin kəskin pisləşməsi səbəbindən əvvəl müalicə olunduğu xəstəxanadan iyunun 13-də Mərkəzi Gömrük Hospitalının reanimasiya şöbəsinə köçürülüb.

Əməkdar artistin ağciyər toxumasının 90%-dən çox hissəsi zədələndiyindən onu ECMO cihazına qoşublar.

B.Bağırzadənin müalicəsi birbaşa Azərbaycanın Birinci vitse-prezidenti Mehriban Əliyevanın nəzarətindədir.

Xatırladaq ki, ECMO ekstrakorporal membran oksigenlənmə cihazı olub, ağciyər və ürək yerinə 2-3 həftə funksiya göstərərək, mövcud olan problemin həlli üçün həkimlərə vaxt qazandıran bir müalicə üsuludur.