Qeyri-neft sektorunda aqrar sahə mühüm rol oynayır. Bu sahənin inkişafı üçün isə savadlı mütəxəssislərin olması mütləqdir.
Hər bir sahədə olduğu kimi, aqrar sahəyə aid məsələlərlə də məşğul olan rəsmi qurumlar, QHT-lər, müstəqil ekspertlər var.
Milli Məclisdə isə bu istiqamətdəki məsələlərlə Aqrar siyasət komitəsi məşğul olur.
Komitə sədri Tahir Rzayev, sədr müavini Sabir Hacıyev, üzvlər Novruzəli Aslanov Azər Badamov, Müşfiq Cəfərov, Emin Hacıyev, Aydın Hüseynov, Eldar İbrahimov, İqbal Məmmədov, Cavanşir Paşazadə, Eldəniz Səlimovdur.
Bəs komitənin fəaliyyəti, orda təmsil olunan deputatların aqrar sahədə bilikləri barədə bu sahənin ekspertləri hansı fikirdədirlər? Komitədə kimlər öz sahəsinin bilicisidir?
Modern.az saytının əməkdaşı bu suallarla aqrar sahə üzrə ixtisaslaşmış ekspertlərə müraciət edib:
Aqrar Elm və İnnovasiya Mərkəzinin şöbə müdiri, aqrar sahə üzrə ekspert Nicat Nəsirli komitədə Eldar İbrahimovun aqrar sahə üzrə daha təcrübəli olduğunu deyir:
"Parlament yenidən formalaşanda tərkib çox dəyişdi. Amma aqrar siyasət komitəsinin tərkibi demək olar ki, köhnə kollektivdir. Bu bir mənada yaxşıdır. Çünki kənd təəssürafatı sahəsində illərin təcrübəsi lazımdır, bu sahə gənclərin işi deyil. Çünki üzvlərin işi qanunvericilik bazasının təkmilləşdirilməsidir. Burda da hansısa qanun təklif edilib, müzakirəyə çıxarılanda 10 il əvvəli xatırlayan şəxslər olmalıdır. Bu baxımdan komitənin məsələlərə reaksiyaları məni çox razı salır. Düzdür, kənd təsərrüfatında bəzi problemlər var, amma ümumilikdə komitənin işi qənaətbəxşdir.
Komitədə fəaliyyətini bəyəndiyim şəxslərdən biri Eldar İbrahimovdur. Mən uşaqlığımdan onu aqrar sahədə görürəm. Bu sahədə kifayət qədər elmi kitablar yazıb və məmnuniyyətlə həmin kitabları oxuyuram. Komitəyə yeni üzv olan İqbal Məmmədov da elə rayondandır ki, həmin bölgədə kənd təsərrüfatı ilk yerdə dayanır. Bu mənada komitənin digər üzvləri də kontingentdir".
Kənd təsərrüfatı üzrə ekspert Vahid Məhərrəmov Aqrar siyasət komitəsində bir neçə sahə üzrə mütəxəssislərin çatışmadığını bildirib:
"Təəssüf ki, komitə öz üzərinə düşən işi tam mənası ilə yerinə yetirə bilmir. Ölkədə su problemi var və bu problemin həlli ilə bağlı biz danışırıq, lakin nəticəsi olmur. Hələ 10 il qabaq təklif etdik ki, suya məsul dövlət məmuru olmalıdır. 5 qurum suya nəzarət edir, amma məsul şəxs yoxdur. Milli Məclisdə sözügedən komitə üzvləri bu məsələni qaldırmalıdırlar. Bu və digər problemlərlə bağlı Aqrar siyasət komitəsinin üzvləri həll yolu tapmalıdır.
Komitə üzvlərinin bəzilərinin aqrar sahədə bilgiləri məni o qədər də qane etmir. Çünki komitənin üzvlərinin bir neçəsi ixtisaslaşmayıb, aqrar sahəni dərindən bilmir. Belə olan halda da aqrar sahədə problemlərin yaranma səbəblərinin dərinliyi gizli qalır. Ümumi sahə ilə bağlı danışırlar, lakin əsas məsələ nədir, onu bilmirlər.
Komitədə öz sahəsi üzrə mütəxəssis olan aqronom, baytar həkim, zootexnik olmalı idi. Çünki aqrar sahənin ürəyi bu ixtisaslardır".
İqtisadçı-ekspert, jurnalist Razi Abasbəyli Aqrar siyasət komitəsinin işini belə dəyərləndirib:
"Milli Məclisin Aqrar Siyasət Komitəsinin bir sıra deputatlarını tanıyıram, onlar arasında 3 və hətta 4-cü dəfə deputat olanlar var. Komitədə bir neçə gənc deputat var. Onların fəaliyyəti haqqında məlumatsızam.
Fəaliyyətə gəlincə, bu ilin ilk yarısında bir sıra strateji qanun layihələri hazırlanaraq müzakirəyə çıxarılıb.
Pandemiya dövründə komitənin fəaliyyəti daha vacib olsa da, etiraf edək ki, gözlənilən mühim layihələr hazırlanmayıb. Bütün dünya post-pandemiya dövrünə hazırlaşdığı bir zamanda əsas diqqəti məhz aqrar sektorun inkişafına yönəldir. Post-pandemiya dövründə daha çox aqrar sahədə islahatlara və mühüm dövlət proqramlarına, o cümlədən də qanunvericilik bazasının formalaşdırılmasına ehtiyac olacaq. Bu baxımdan komitənin fəaliyyətini heç də yüksək qiymətləndirə bilmərəm. Komitədəki deputatların da hansı səviyyədə səmərəli fəaliyyət göstərdikləri ümumilikdə komitənin ortada olan işi ilə dəyərləndirilə bilər".
