Bu gün Azərbaycan Turizm İnustutunda Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən “Karyerada ilk addım” devizi altında aktiv məşğulluq tədbiri keçirilib. Bu barədə Modern.az-a Əmək və Əhalinin Sosial Müdafiəsi Nazirliyidən məlumat verilib. Tədbirdə 57 müəssisə və təşkilat tərəfindən 405 boş iş yeri təqdim olunub. Həmin müəssisələrdən 3-ü dövlət, 54-ü qeyri-dövlət müəssisələridir. Tədbirin əsas məqsədi , işəgötürənlərlə tələbə və məzunların bilavasitə qarşılıqlı ünsiyyətini təşkil etmək, eyni zamanda iş axtaran vətəndaşların layiqli işlə təminatına köməklik göstərmək olub.
Qeyri-neft sektoru üzrə fəaliyyət göstərən iri şirkət və kompaniyalardan «European Tobacco–Baku» ASC, «Azərsun Holding» MMC, «Veysəloğlu Yayıcılı Qardaşlar» MMC, «İmprotex Travel» MMC, «Atəşgah» Sığorta Şirkəti, «Ataturizm» MMC, «Paşa Travel» MMC, Qobustan Milli Tarixi Bədii Qoruğu və digər müəssisələr də iştirak ediblər.
Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinin rəisi Anar Bədəlbəyli bildirib ki, bu vaxtadək Bakı şəhərində «Karyerada ilk addım» devizi altında keçirilmiş tədbirlərdə 1134 nəfər münasib işlə təmin edilib.
Qeyd edək ki, «Karyerada ilk addım» devizi altında növbəti tədbir 22 iyun 2012-ci il tarixdə «Qafqaz» Universitetində təşkil ediləcəkdir.
Şahanə Rəhimli