20 yanvar faciəsini törədən sovet ordusunun hərbçiləri barədə 68 cildlik cinayət işi SSRİ-Prokuroluğu tərəfindən Moskvaya aparılıb və bu vaxta kimi qaytarılmayıb. Modern.az-ın məlumatına görə, bu barədə jurnalistlərə bugünkü açıqlamasında respublikanın baş prokuroru Zakir Qaralov bildirib. Onun sözlərinə görə, 20 yanvar hadisələri ilə bağlı o vaxtkı hakimiyyət lazımı tədbirlər görməyib.
“Azərbaycandakı sovet hakimiyyəti öz xalqını müdafiə etməyib və 20 yanvar hadisələrinə düzgün hüquqi-siyasi qiymət verməyib. Təəsüflər olsun ki, sovet hərbçilərinə qarşı açılmış cinayət işi SSRİ Prokurorluğu tərəfindən xətm olunub. Yalnız ümummilli lider Heydər Əliyev hakimiyyətə gələndən sonra həm bu hadisələrə hüquqi-siyasi qiymət verilib, həm də o dövrdəki cinayət işləri bərpa olunub”-deyə baş prokuror bildirib. Onun sözlərinə görə, xalqımıza qarşı törədilmiş bu cinayətdə əli olduğuna görə Əbdürrəhman Vəzirov, Ayaz Mütəllibov və Vaqif Hüseynovun cinayət məsuliyyətinə cəlb olunması haqqında xüsusi qərar qəbul edilib. Baş prokuror bu şəxslərin mühakimə olunacağını bəyan edib.