Bakı şəhər sakinləri Vadim Quliyev və Nikolay Limberq qabaqcadan əlbir olaraq Bakı şəhər sakini, 25 yaşlı Timur Əliyevi girov götürüb və valideynlərinə qaytarılması müqabilində 1 milyon manat verilməsini tələb ediblər. Modern.az xəbər verir ki, məlumatı Daxili İşlər Nazirliyi yayıb.
DİN-dən bildirilib ki, girovun atası Sərdar Əliyev cinayətkarlara 1 ədəd “Mitsubishi Pajero”, 1 ədəd “VAZ-2107” markalı avtomaşınlarını, 33 min manat nəqd pul və 4160 manat dəyərində qızıl-zinət əşyaları verdikdən sonra Timur azad edilib.
Hadisə barədə əməliyyat məlumatı əldə edən DİN Baş Mütəşəkkil Cinayətkarlıqla Mübarizə İdarəsinin əməkdaşları “isti izlər”lə əməliyyat-axtarış tədbirlərinə başlayıblar. Nəticədə cinayətkarlar – V.Quliyev, N.Limberq və R.Hacıyev Nəsimi rayonu ərazisindəki “Nəsimi” bazarının yaxınlığında S.Əliyevdən əlavə olaraq 30.000 dollar alarkən əməliyyat qrupu tərəfindən yaxalanıblar.
