Avqustun 30-da ADU-nun rektoru, millət vəkili, professor Səməd Seyidov Çin Xalq Respublikasının Azərbaycandakı fövqəladə və səlahiyyətli səfiri cənab Honq Fiuyini qəbul etdi. Görüşdə ADU-da Çinşünaslıq ixtisasının açılması, habelə bu ali təhsil ocağında Çin mədəniyyəti və dil mərkəzinin yaradılması, həmçinin gələcəkdə müəllim-tələbə mübadiləsi haqda fikir mübadiləsi aparıldı.
Rektor Səməd Seyidov səfiri universitetdə görməkdən məmnunluğunu dilə gətirdi. O, Dillər Universiteti olaraq Çinin Azərbaycandakı səfirliyi ilə əməkdaşlığa xüsusi yer verdiyini bildirdi. Səməd Seyidov qarşılıqlı əlaqələrin mövcudluğundan söz açaraq qarşıdan gələn yeni tədris ilinin əvvəlində bu görüşün universitet üçün əhəmiyyətli olduğunu vurğuladı. Rektor 2012-2013-cü yeni tədris ilində ADU-nun Regionşünaslıq və Beynəlxalq münasibətlər fakültəsində Çinşünaslıq ixtisası üzrə tələbələrin qəbul olunduğunu səfirin diqqətinə çatdırdı. Rektor Səməd Seyidov bu ixtisas üzrə ADU-da təhsil alacaq 10 nəfər tələbənin siyahısını səfirə təqdim etdi. Səməd Seyidov həmin tələbələrin universitetə yüksək balla daxil olduqlarını vurğuladı. O, Çinşünaslıq ixtisasında təhsil alacaq tələbələrin Çin dili ilə yanaşı, ölkənin tarixi və mədəniyyətini dərindən öyrənəcəklərini bildirdi. Səfir Honq Fiuyin Çinin Azərbaycandakı səfirliyinin ADU ilə əlaqələrini vacib saydı.