Macarıstanın Budapeşt şəhərindəki həbsxanada ömürlük cəza çəkməkdən azad olunan zabitimiz Ramil Səfərov artıq Bakıdakı ata evindədir.
Bu barədə Modern.az-a Ramilin atası Sahib Səfərov məlumat verib. Sahib müəllim hadisənin onun üçün gözlənilməz olduğunu və hədsiz sevinc yaşadığını vurğulayıb.
O, əməkdaşımıza bildirib ki, hazırda evinə o qədər insan axışır ki, onların təbriklərini qəbul etməyə imkanı yoxdur. S.Səfərov Azərbaycan prezidenti, Ali Baş komandan İlham Əliyevə təşəkkür edib.
Ramil Səfərovun özü isə APA-ya açıqlamasında başda Azərbaycan prezidenti, Ali Baş komandan İlham Əliyev olmaqla hər kəsə təşəkkür edib:
“Bu, ədalətin bərpasıdır. Bu mənim üçün bir az gözlənilməz oldu. İndi ətrafımda həddən artıq çoxlu sayda insan var. Ümidvaram ki, daha sonra suallarınıza ətraflı cavab verə biləcəyəm”.