Modern.az

Azərbaycanda Qurban bayramının fətvası verildi

Azərbaycanda Qurban bayramının fətvası verildi

Aktual

22 Oktyabr 2012, 11:31

Qafqaz Müsəlmanları İdarəsinin (QMİ) Qurban bayramı münasibəti ilə  fətva verib.
Modern.az saytının məlumatına görə, QMİ-nin fətvasında bildirilib ki, müqəddəs Qurban bayramı (Eydül-Əzha) miladi tarixi ili 25-26 oktyabr 2012-ci ilə təsadüf edir. Bu münasibətlə Qafqaz Müsəlmanları İdarəsi və onun rəhbərliyi Azərbaycan xalqını və eləcə də bütün müsəlmanları təbrik edir, belə bir əziz gündə Allah-Təaladan hamıya mərhəmət və məgfirət diləyir.

Fətvada qeyd edilib ki, şəriət qanunlarına görə qurban kəsmək əsasən Məkkədə hacılara vacibdir. Digər yerlərdə isə imkanlı adamların qurban kəsmələri Allah-Təala yanında cox bəyənilmiş əməllərdən hesab olunur, amma vacib deyildir. Qurban ətini fəqir və kasıb ailələrə paylamaq böyük savabdır.

“Qurban kəsilən heyvan sağlam və kök olmalıdır. Xəstə, arıq və qüsurlu heyvanlar qurbanlığa layiq və məqbul sayılmır. Qurban qoyun, keci, öküz-inək və dəvə olmalıdır. Bundan əlavə, beş-altı adamın cəmləşib bir heyvanı qurban kəsmələri çox yerlərdə el adətinə çevrilmişdir. Yaxşı olar ki, bu zaman bölgü aparanda həmin şəriklər biri-digərinə halallıq versinlər. Onlara yetişən pay üc hissə olsa yaxşıdır: bir hissə özünün, bir hissə fəqir və kasıb ailələrin, bir hissəsi də hədiyyə kimi qonşu və qohum əqrəbalara paylanır. Bir qayda olaraq İsmayıl qurbanını kəsərkən heyvanı uzu qibləyə uzatmalı, qoyundursa qıçının birini azad saxlamalı, iribuynuzlu heyvandırsa dörd ayağını da möhkəm bağlamaq lazımdır. Heyvanın boğazına bıçaq qoyularkən, yaxşı olar ki, Qurbankəsmə duası oxunsun, heç olmasa, «Bismillahi və billahi vəllahu əkbər» deyərək kəsilsin. Müstəhəbdir ki, kəsilməmişdən əvvəl heyvana su verilsin”-deyə fətvada bildirilib.

QMİ-mim fətvasında o da qeyd edilib ki, həzrət Peyğəmbərimiz (s) Qurban bayramı günlərində özünü rahat və məsud hiss edərmiş. Çünki bu günlərdə elə adam olmur ki, onun ailəsində qazan qaynamasın.

“Dövlətimiz rəsmi olaraq Azərbaycanda iki gün 25-26 oktyabr tarixlərini Qurban bayramı elan etmişdir. 25 oktyabr bayram axşamı, 26 oktyabr isə bayram günüdür. Bayram namazı 26 okytabrda Əjdərbəy və  Təzəpir məscidlərində saat 9-da qılınacaqdır. Tövsiyə edərdik ki, bu muqəddəs bayram gunundə kəsilən qurbanlıqları baytarlıq qayda-qanunlarına ciddi əməl olunmaqla münasib yerlərdə icra edəsiniz. İnsanı öz Yaradanına yaxın edən Qurban bayramının sevincini qaçqın, köçkün, kimsəsiz soydaşlarımıza, maddi sıxıntı çəkən insanlara da yaşatmaq, onu hamı ilə birgə könül xoşluğu ilə keçirmək Allaha xoş gələn savab əməllərdəndir. Həmçinin, imkanı olmayanların Qurban günü iki rükət namaz qılması ibadət sayılır. Allah-Təalaya dua edək ki, növbəti Qurban bayramımız Qarabağ torpaqlarında qeyd olunsun. Qoy Allah-Təala insanların mənən saflaşması və həmrəyliyini təcəssüm etdirmək məqsədi ilə qərar verdiyi bu bayram günündə kəsdiyiniz qurbanları və ibadətlərimizi qəbul etsin. Amin!”.

Modern.az 

Twitter
Sizə yeni tvit var
Keçid et
Ukraynadan Rusiyaya ardıcıl zərbələr: Vəziyyət kritikdir