(İçsəs)
Dünya səviyyəsi – yadlıq, özgəlik səviyyəsi, ölçüsüdür.
***
Hər şeyin dünya səviyyəsinə çatdırılması – hər şeyin dünyanın yadlığına, özgəliyinə uyğunlaşdırılması, güzəştə gedilməsidir.
***
Dünya səviyyəsi qondarma, zorakı ölçüdür: ölkələri, ulusları öz normal yaşam yönündən ayırmaq, yüyürtmək, yormaq, əldən salmaq və sıradan çıxartmağa xidmət edir.
***
Dünya səviyyəsindən geri qalmayan ölkələr yaradırlar, əslində ölkələri qlobalçılığın içərisində əridirlər.
***
Azərbaycanda dünya səviyyəsinə uyğun əxlaq yaranır – əxlaqsızlıq artır.
***
Azərbaycanda dünya səviyyəsinə uyğun mənəviyyat yaranır – mənəviyyatsızlıq artır.
***
Azərbaycanda dünya səviyyəsinə uyğun sənət yaranır – bütün sənətlərdə dünyanı yamsılamalar artır, mənasızlıq baş alıb gedir.
***
Öz ulusal səviyyəmizi yaratmadan dünya səviyyəsinə can atırıq – səviyyəsizləşirik.
***
Öz səviyyən varsa, dünya səviyyəsinə nə gərək var?
***
Dünya səviyyəsi xalqları yaratmır – uçurur, öldürür; böyütmür – kiçildir. Ona görə dünyada səviyyəsizlik artır.
***
Dünyaya uyğunlaşmaq, oxşamaq, onu yamsılamaq – xalqın yaranması, yetişməsi deyil, uçurulmasıdır.
***
Başqasına oxşamaqla yaranmaq – yoxdur.
***
Özün olmaqla, özümlüyünü yaratmaqla yaranmaq – var.
***
Fərd kimi yetişmədən – xalq kimi yaranmaq olmaz.
***
Fərd kimi nəsənsə – xalq kimi də osan.
***
Fərdi səviyyə yaranmadan – xəlqi səviyyə yarana bilməz.
***
Öz ulusal səviyyəsi olan – dünya səviyyəsinə gərək duymaz.
***
Azərbaycanda Azərbaycan səviyyəsi yaratmaq gərək – dünyaya gərək olan.
***
Dünyada Azərbaycan səviyyəsi yaratmaq gərək – inam, idrak, mənəviyyat, iradə səviyyəsi – dünyanı heyrətləndirən.
***
Millilikdən qıraqda dünyəvilik – yoxdur.