Son vaxtlar digər ölkələrdə olduğu kimi, Azəbaycanda da koronavirusa yoluxma və ölüm halları artır. Belə ki, dünyada COVID-19 infeksiyasına yoluxanların ümumi sayı 218 milyonu ötüb, yarım milyona yaxın insan pandemiyanın qurbanı olub.
İndiyədək ölkəmizdə 428 mindən çox yoluxma halı aşkar edilib, 5700-ə yaxın şəxs bu xəstəlikdən dünyasını dəyişib.
Təhlükəli virusa yoluxan və bu səbəbdən həyatlarını itirənlər arasında vəkillər də var.
Modern.az koronavirusdan vəfat edən vəkillərlə bağlı məlumatları təqdim edir:
Vəkillər Kollegiyasının üzvü, vəkil Adil İsmayılov ötən ilin dekabrında 63 yaşında COVİD-19-dan vəfat edib.
A.İsmayılov 30 illik vəkil təcrübəsində bir sıra tanınmış şəxslərin hüquqlarını müdafiə edib.
2020-ci il noyabrın 28-də 22 saylı Vəkil Bürosunun rəhbəri, tanınmış vəkil Tahir Əlirzayev koronavirusdan dünyasını dəyişib.
Bu il martın 29-da tanınmış hüquqşünas, Milli Hüquq Evinin rəhbəri Nicat Gözəlov 55 yaşında COVİD bəlasının qurbanı olub.
Mərhum hüquqşünas 2020-ci ildə deputatlığa namizəd olmuşdu.
2020-ci il dekabrın 23-də 15 saylı vəkil bürosunun vəkili Heydər Əsgərov COVID-19 xəstəliyindən vəfat edib. 66 yaşlı H.Əsgərov 17 il vəkillik fəaliyyəti ilə məşğul olub.
Ötən il dekabrın 3-də Vəkillər Kollegiyasının üzvü, “Lider” Vəkil bürosunun rəhbəri Əli Ələkbərov COVID-19 infeksiyasından dünyasını dəyişib.
2020-ci il dekabrın 1-də Tərtər rayon Vəkil Bürosunun vəkili Yusif Seyidov koronavirusa yoluxma səbəbindən həyatla əbədi vidalaşıb.
Ötən il iyulun 18-də Vəkillər Kollegiyasının üzvü Rəfiqə Seyidova 62 yaşında bu xəstəlikdən vəfat edib.
R.Seyidova 14 saylı Vəkil Bürosunun vəkili olub.
Bakı şəhəri 25 saylı Vəkil Bürosunun vəkili Fərman Əfəndiyev avqustun 23-də dünyasını dəyişib. Onun ölüm səbəbi də koronavirus olub.
Qeyd edək ki, koronavirus infeksiyası 2019-cu ilin dekabrında Çinin Uhan şəhərində yayılmağa başlayıb. Ümumdünya Səhiyyə Təşkilatı ötən ilin fevralın 11-də infeksiyanı COVID-19 adlandırıb, martın 11-də isə koronavirusu pandemiya elan edib.
