Ötən ilin qızıl payızının əvvəllərində başladığılmız müqəddəs Vətən savaşımızda yanımızda olan qardaş Türkiyə Cümhuriyyəti 1 il keçəndən sonra 44 günlük Zəfərimizi də qeyd edir. Bu məqsədlə ölkənin siyasi, təhsil və beynəlxalq dairələrində Azərbaycanın qazandığı zəfərə həsr olunmuş konfranslar, şənliklər və yığıncaqlar keçirilir.
Modern.az xəbər verir ki, dünən Ankara İldırım Bəyazid Universiteti (AYBU) Beynəlxalq Münasibətlər və Starteji Araşdırmalar (ULİSA) İnstitutunda “Qarabağda normallaşma dövrü: hüquqi və siyasi dəyərləndirmələr” adlı konfrans təşkil olunub.
Konransda Azərbaycanın Türkiyədəki fövqəladə və səlahiyyətli səfiri Rəşad Məmmədov və Azərbaycan Ombudsmanı Səbinə Əliyeva da iştirak edib. Azərbaycanın səfiri Rəşad Məmmədov və Ankara Universitetin (AYBU) rektoru dr. İldırım Aydınlın, Türkiyə İnsan Haqları ve Bərabərlik hüquqlu Qurumun rəhbəri prof. Müharrəm Kılıç arasında keçirilən söhbətində Azərbaycanın bu günü, Türkiyə ilə yeni münasibətlər, təhsil islahatları ətrafında söhbət ediblər.
Azərbaycanın səfirinin sözlərinə qüvvət verən rektor İldırım Aydınlı bu gün Türkiyənin gündəminin Azərbaycan olduğunu söyləyib. Və qeyd edib ki, rəhbərlik etdiyi 11 yaşlı təhsil ocağında dünyanın bütün ölkələrindən olan tələbələr təhsil alır. Burada təhsil alan azərbaycanlı tələbələr haqqında da məlumat verib. Professor İldırım Aydınlı 2 milyon kvadrat metr ərazini əhatə edən universitetin Həsənboğa hava limanı istiqamətindən açılan giriş qapısı tərəfindən Azərbaycan şəhidləri və qazilərinin adına 3 min kvadrat metr ərazidə meşəlik massivi salmaq istədiklərini, buradakı ağacların hər birinin üstündə Qarabağın azadlığı, 44 günlük müharibədə şəhid olanlar və Xocalıda həyatını itirənlərin xatirə lövhəsinin yazılacağını bildirib.
Azərbaycan diplomatı R.Məmmədov hər bilikli bir tələbənin təkcə Azərbaycanın deyil, türk dünyasının qazancı olduğunu, alınan nəticələrin hamımızın uğuru sayıdlığını söyləyib. Və əlavə edib ki, Ankara Bəyazit İldırım adına Universitetin ərazisində salınacaq meşə massivinin ərsəyə gəlməsində əlindən gələn köməyi əsirgəməyəcək.
Görüşün ikinci hissəsində isə Ankara İldırım Bəyazid Universiteti (AYBU) Beynəlxalq Münasibətlər və Starteji Araşdırmalar (ULİSA) İnstitutunda “Qarabağda normallaşma dövrü: hüquqi və siyasi dəyərləndirmələr” adlı panel konfransı öz işini davam etdirib.
AYBU ULİSA rəhbəri doç.dr.İbrahim Dəmir, Azərbaycan Ombudsmanının nümayəndəsi Zaur Vəliməhmədli, İran Araşdırmalar Mərkəzinindən Kənan Aslanlı, Qəhrəmanmaraş Sütçü İmam Universitetinin Siyasət və Beynəlxalq Münasibətlər bölümünün rəhbəri professor Toğrul İsmayıl iştirak ediblər. Panel müzakirəsinin iştirakçıları Qarabağadakı quruculuq, mövcud vəziyyət, hüquqları 30 il müddətində pozulmuş yurd insanlarının taleyi, bu cinayəti törödənlərin dünya məhkəmələrində cəzalandırılması məsələləri müzakirə olunub.
