Milli Məclisin mətbuat xidməti xəbər verir ki, fevralın 20-də İran parlamentində Milli Məclisin Sədri Oqtay Əsədovla İslam Şurası Məclisinin sədri Əli Laricaninin görüşü keçirilib. Əli Laricani bu səfəri İran –Azərbaycan münasibətləri üçün əhəmiyyətli hadisə adlandırıb: “İran - Azərbaycan əlaqələri yaxın qonşu, qardaş və dost ölkələrin münasibətləridir. Parlamentlərarası əlaqələr bu münasibətlərin çox əhəmiyyətli istiqamətlərindən biridir. İranın dövlət rəhbərləri həmişə Azərbaycana yaxşı münasibət göstərirlər və bu təbiidir”. İran parlamentinin başçısı Dağlıq Qarabağ probleminə də xüsusi olaraq toxunub: “İran Azərbaycanın ərazi bütövlüyünü həmişə dəstəkləyib və bu mövqeyində qətidir. Dağlıq Qarabağ probleminin tezliklə həllinin vacibliyini İrana səfərə gəlmiş Ermənistan nümayəndələrinin diqqətinə çatdırmışıq. Region ölkələri Dağlıq Qarabağ münaqişəsinin həlli üçün səyləri artırmalıdırlar. İran buna həmişə hazırdır”.
Milli Məclisin Sədri Oqtay Əsədov rəsmi dəvətə görə İran parlamentinin sədrinə təşəkkürünü bildirib: “Azərbaycan dövləti özünün xarici siyasətində İranla münasibətlərə xüsusi əhəmiyyət verir. Bu münasibətlər dövlət başçılarının müəyyənləşdirdiyi prinsiplər əsasında uğurla davam edir, ilbəil genişlənir və inkişaf edir. Azərbaycanın İranla münasibətlərində parlamentlərarası əməkdaşlığın istiqamətlərindən biri kimi parlament dostluq qrupları arasında əlaqələr zəruridir. Hər iki parlamentdəki komitələrin əlaqələrinin canlandırılması faydalı olardı”. Qarabağ münaqişəsinin nizama salınması prosesindəki son duruma toxunan Azərbaycan parlamentinin Sədri Oqtay Əsədov məhz Ermənistanın qeyri-konstruktiv mövqeyi nəticəsində bu məsələnin düyünə düşdüyünü Əli Laricaninin diqqətinə çatdırıb: “ Dağlıq Qarabağ probleminin həlli göründüyü kimi nə qədər çətin olsa da Azərbaycan heç vaxt öz torpaqlarında başqa bir dövlətin yaradılmasına imkan verməyəcək”. Elə həmin gün Azərbaycan parlament sədrinin İranın milli təhlükəsizlik üzrə Ali Şurasının Baş katibi Səid Cəlili ilə görüş keçirilib. Bu görüşdə İran – Azərbaycan münasibətlərinin bir sıra aspektləri müzakirə olunub. Səid Cəlili qeyd edib ki, İran qonşu və qardaş Azərbaycanın dövlət müstəqilliyinə, onun təhlükəsizliyinə xüsusi əhəmiyyət verir və hörmətlə yanaşır. Azərbaycan parlamentinin sədri vurğulayıb ki, Azərbaycanın təhlükəsizliyi bütövlükdə regionun təhlükəsizliyi üçün böyük əhəmiyyət daşıyır: “Azərbaycan qonşu dövlətlərin təhlükəsizliyinə hörmətlə yanaşır və bütün imkanlarını səfərbər edir ki, bölgədə münaqişələr yaranmasın, mövcud problemlər beynəlxalq hüquq çərçivəsində ədalətlə həll olunsun, bölgədə qarşılıqlı faydalı əməkdaşlıq atmosferi yaransın. Lakin Ermənistanın təcavüzkar siyasəti hələ ki, buna imkan vermir. Azərbaycan bütün mümkün vasitələrdən istifadə edir ki, Ermənistan təcavüzünün hələ də qalmaqda olan ağır nəticələrinə ədalət və beynəlxalq hüquq əsasında son qoyulsun. Bu mənada regionun bütün dövlətləri bölgəmiz üçün vacib olan təhlükəsizliyin təmin olunmasında səylərini artırmalıdırlar”.
Modern.az
