Akif TƏVƏKKÜLOĞLU
Əməkdar jurnalist
Adamı həsrətmi ovudar Allah ?
Çəkdiyim həsrətdə təsəllim də var.
Həsrətsiz yaşamaq olmayır Vallah,
Həsrətin nə sonu, nə əvvəli var.
Təpədən - dırnaqa həsrətdir dünya.
Gündüz tamarzıdır ulduza-aya.
Gecə bürünsə də, şənliyə, toya
Zülmətin gündüzə bir həsrəti var...
Ağac həsrət qalır qışda yarpağa,
Susuz torpaq dönməz bağçaya – bağa,
Qalaqlanıb sinəmdə həsrət dönübdü dağa,
Hər kəsin ötən çağa qayıtmaq həsrəti var...
Qəlbimdə çay kimi həsrət axını,
Bürüyüb laylaya uzaq – yaxını,
Hansını söyləyim, deyim hansını,
Mənim dünya qədər bir həsrətim var.
Gözlərimiz yoldadır, nisgilli yurd həsrəti,
Tülkü-çaqqalı boldur, meşəsi “Qurd” həsrəti,
Bəhrəsiz qalan bağlar alma-armud həsrəti
Yağmalanan torpağın azadlıq həsrəti var.
Ey həsrətdə yaşayan!
Dərdi – qəmi daşıyan!
Bil ki, zaman gələcək,
Ellər yurda dönəcək!
Nisgilimiz bitəcək!
Həsrət sona yetəcək!
