Qlobal iqtisadi böhran və “donuz qripi”  epidemiyasının təsirindən turizm sektoru 2009-cu ildə ən çətin dönəmlərdən birini yaşadı. Dünya Turizm Təşkilatının açıqlamalarına görə, ondan öncəki ilə nisbətən 2009-cu ildə turist sayı 4,3% azaldı. Avropada 6%-lik bir azalma, Şimali və Orta Avropada 8% azalma oldu.

Modern.az xəbər verir ki, Türkiyə Səfirliyinin Mədəniyət və Tanıtma Müşaviri Melda Araz 2009-cu ildə dünya turizmində yüksəlişə nail olan tək ölkənin Türkiyə olduğunu bildirib. Melda Arazın açıqlamasına görə, dünyanın ilk 10 turizm ölkəsi arasında 2009-cu ili artımla başa vuran tək ölkə olan Türkiyənin öncəki ilə nisbətdə artımı 2,8% olub. 26,3 milyon ziyrətçi ilə 2008-ci ili başa vuran Türkiyə 2009-cu ildə 27,1 milyon turisti qəbul edib.

2009-cu ildəki qlobal iqtisadi böhrana baxmayaraq Türkiyə ən çox turist qəbul edən ölkələrin sırasında daha bir pillə yüksələrək 7-ci yerdə qərarlaşıb.

İstanbulda Türkiyə Cümhuriyyəti Kültür və Turizm Bakanlığına bağlı muzeyləri ziyarət edənlərin sayı 2009-cu ildə ondan öncəki ilə nisbətən 38% artaraq 6 milyonu keçib, bu muzeylərdən 2009-cu ildə əldə edilən gəlir əvvəlki ilə görə 40% artaraq 53, 6 milyon türk lirəsi (TL) olub. Türkiyə Səfirliyi Mədəniyyət və Tanıtma Müşaviri Melda Arazdan alınan məlumata görə, 2009-cu ildə İstanbulda ən çox ziyarət edilən tarixi məkan 2,9 milyon ziyarətçi ilə 1481-ci ildə inşa edilən və 1924-cü ildən bəri muzey kimi fəaliyyət göstərən Topqapı Sarayı olub. Bunu 2,4 milyon ziyarətçi ilə 537-ci ildə tikilən və 1935 – ci ildən turistlərin ziyarətinə açıq olan Ayasofya Muzeyi izləyir.

İstanbulda  TBMM-nə bağlı saray, köşk və qəsrləri isə 2009-cu ildə 1,1 milyon yerli və yabançı turist ziyarət edib. Bundan  9,5 milyon TL gəlir əldə edilib. TBMM-nə bağlı saraylar içində Dolmabaxça Sarayı 818 min ziyarətçi ilə ən çox turist qəbul edən məkan olub.

2010-cu ildə İstanbulun Avropanın Mədəniyyət Paytaxtı elan olunmasıyla əlaqədar olaraq bir sıra tarixi məkan və muzeyin təmir və restovrasiya edildiyinə və yeni muzeylərin açıldığına diqqəti çəkən Melda Araz 2009-cu ildə İstanbul Böyükşəhər Bələdiyyəsi tərəfindən açılan “Panorama 1453 Tarix Muzeyi”nin bunlardan biri olduğunu və 1 ildə bu muzeyin 700.000 turist tərəfindən ziyarət edildiyini bildirib.

Bütünlüklə Türkiyədə isə 2009-cu ildə T.C. Kültür və Turizm Bakanlığına bağlı olan 320 muzey və tarixi məkanları ziyarət edənlərin sayı 21,2 milyon, bundan əldə olunan gəlir isə 146,7 milyon TL olub. Modern.az