ABŞ-ın Nyu Meksiko ştatının Senatı və Nümayəndələr Palatası Xocalı soyqırımına dair qətnamə qəbul edib. Azərbaycan XİN-in məlumatına görə, yekdilliklə qəbul edilmiş qətnamədə 1988-ci ildən bəri davam edən Ermənistan-Azərbaycan münaqişəsi və 1992-ci ilin 25-26 fevral tarixlərində Ermənistan silahlı qüvvələri tərəfindən 600-dən artıq azərbaycanlının, o cümlədən uşaq, qadın və yaşlıların xüsusi amansızlıqla qətlə yetirildiyi və 1200-dən artıq insanın əsir götürüldüyü qeyd olunur.
Beynəlxalq təşkilatların hesabatlarında, ABŞ-ın və dünyanın bir sıra xəbər agentliklərinin Xocalı soyqırımını işıqlandırdığı, dünyanın müxtəlif dövlətləri tərəfindən soyqırımın pisləndiyi göstərilir.
Qətnamədə həmçinin, Ermənistan-Azərbaycan münaqişəsinin bu günə kimi davam etdiyi, Azərbaycan ərazilərinin 20%-nın, o cümlədən Dağlıq Qarabağ və ətraf yeddi rayonun işğal olunduğu vurğulanır. Ermənistan tərəfindən Azərbaycan ərazilərinin işğalını pisləyən BMT Təhlükəsizlik Şurası və Baş Assambleyası tərəfindən müvafiq qətnamələrin qəbul edildiyi göstərilir.
Modern.az