(İçsəs)
İyrənmək (nifrət, ikrah) – sevmədiyin, inanmadığın, bəyənmədiyin bir şeyin varlığından sıxılmaq, darılmaqdır.
***
İnsan ona yaxşı olanı, xoş gələni sevir. Sevilən – inanılan, cəzb edən, özünə çəkən, vurğunluq yaradandır.
***
Sevilməyən, inanılmayan, cəzb etməyən, özündən qaçıran – iyrəniləndir (nifrət, ikrah yaradandır).
***
İyrənilən, nifrət edilən – eşidib, bilib, görüb inandığımız və sonunda aldandığımız nəsnədir. O, bizi daha özünə çəkmir, inandırmır, özündən qaçırdır, iyrəndirir – iy verir.
***
Nifrət, ikrah – ruhun iyrənməsidir. Ruh – ruhani olmayandan iyrənir, üz çevirir, ona qarşı barışmaz olur.
***
İyrəndiyimiz, nifrət etdiyimiz – inamımıza, sevgimizə layiq olmayandır.
***
Özünəqıyma (intihar) – özündən, yaşamdan, gerçəklikdən iyrənmədir.
***
Başqasına qıyma – başqasından iyrənməkdir.
***
İyrənmə – inamın inamsızlığa, sayğının sayğısızlığa, sevginin sevgisizliyə çevrilməsi, yaxşı bir şeyin özünə qarşı dayanmasıdır.
***
İyrənmək – gücsüzlük, sarsıntı, inamsızlıq, qorxu yaradır və onlara yarayır.
***
İyrənmək – özünə və başqasına inanmağa gücü çatmamaqdır.
***
İnsanlığa uyğun olmayan hər şeydən iyrənmək, qaçmaq, boyun qaçırmaq!
***
İyrənilən (nifrət edilən) – sarsıdır, qorxudur, ona görə üzüntü yaradır.
***
İyrənmək, nifrət duyğusuyla yaşamaq – kiminsə, nəyinsə iyrəncliyi ilə barışmadığın halda ona qarşı dura, düşdüyün durumu aşa bilməməkdir.
***
Ən yaxşısı – iyrəndiyinlə barışmamaqdır!
***
Barışmazlıq – iyrəndiyini özündə yaşatmamaqdır.
***
Öz içindəki iyrənclikdən qurtulan – iyrənməkdən qurtulandır.
***
İyrəndiyin duyğunu öz içində öldür ki, iyrəndiyin kimsə gözündə ölsün!