Azərbaycanın "Azerspace/Africasat-1” peyki fevralın 15-də öz orbitində yerləşəcək. Modern.az-ın məlumatına görə, bu sözləri “Azərkosmos” ASC-nin sədri Rəşad Nəbiyev deyib. Onun sözlərinə görə, sınaqlara təxminən 20 gün lazımdır və martın ilk ongünlüyündə peyk ASC-nin idarəçiliyinə təhvil veriləcək.R. Nəbiyev bildirib ki, hazırda peykin resurslarının 40 faizindən çoxu icarəyə verilib. Peykin resurslarının reallaşdırılmasından ilk daxilolmalar may ayından başlayacaq. “Azərkosmos” ASC-nin sədri bildirib ki, artıq may ayından etibarən icarə ilə bağlı ödənişlər Azərbaycan tərəfinə ödəniləcək. Belə ki,Azərbaycanın “Azerspace-1” ilk telekommunikasiya peykinin resurslarının 42-43%-i artıq 15 illik müddətə Malayziyanın “Measat” peyk operatoruna icarəyə verilib. Onun sözlərinə görə bu bazar çox səmərəli və rəqabətlidir, burada qiymətləri məhz bazar təyin edir: «Hesab edirəm ki, Azərbaycanın təklif etdiyi qiymətlər rəqabətə davamlıdır».
ASC sədri onu da əlavə edib ki, “Azerspace-1” peykinin sığortalanması ilə əlaqədar bağlanılan müqaviləyə əsasən, orbitdə baş verə biləcək bütün qəza hallarında “Azərkosmos” ASC sığorta ödənişləri hesabına “Azerspace-1” layihəsini davam etdirmək imkanına sahib olacaq.
Xatırladaq ki, ABŞ-ın “Orbital Sciences” şirkəti tərəfindən istehsal olunan “Azerspace-1” peykt “Ariane-5” kosmik daşıyıcısı ilə orbitə çıxarılıb. Peykin ümumi çəkisi 3 250 kq təşkil edir və onun istifadə müddəti 15 ildir. Peyk Mərkəzi Asiya, Avropa və Afrika ölkələri üçün xidmət göstərəcək. .
Eyni zamanda peykin imkanlarının 20%-i Azərbaycanın tələbatını ödəmək üçün, qalan 80%-i isə kommersiya məqsədilə istifadə ediləcək. Yer səthinin müşahidəsi üçün Azərbaycan peykinin aşağı yer orbitinə çıxarılması 2015-ci ilə, ikinci telekommunikasiya peykinin orbitə çıxarılması isə 2016-cı ilə planlaşdırılıb.
Aytən Əliyeva
