Xocalı soyqırımı barədə həqiqətlərin dünya ictimaiyyətinə çatdırılması istiqamətində tədbirlər davam edir. Bununla əlaqədar daha bir etiraz aksiyası İspaniyada Azərbaycan səfirliyinin təşəbbüsü və dəstəyi ilə Madriddə baş tutub. Burda təhsil alan azərbaycanlı tələbələr paytaxtın mərkəzi küçəsi olan “Gran via”-da Xocalı soyqırımına həsr olunan çadır quraşdırıb.
Həmin çadırda “Justice for Khodjaly” köynəkləri geyinən azərbaycanlı gənclər 7 saat ərzində Heydər Əliyev Fondunun soyqırımı ilə bağlı hazırladığı müxtəlif nəşrləri, səfirlik tərəfindən ispan dilində hazırlanan bukletləri ictimaiyyət arasında paylayıb və “Uşaqların gözü ilə Xocalı faciəsi” rəsm sərgisi nümayiş etdirilib.
