Dahi Azərbaycan şairəsi Məhsəti Gəncəvinin 900 illik yubileyi tədbirləri ərəfəsində şairənin həmyerliləri çox qiymətli hədiyyə alıblar. İspaniya kraliçası, Yunanıstan və Danimarka şahzadəsi Sofiya Nizami Gəncəvi Beynəlxalq Mərkəzinə dahi Azərbaycan şairəsinin rübailərinə və qəzəllərinə çəkilmiş qədim miniatürlər, illüstrasiya və əlyazmaları bağışlayıb. Hədiyyə olunan miniatürlər XIV-XV əsrlərə aiddir
Gəncə şəhər İcra Hakimiyyətindən Modern.az-a bildirilib ki, bu nadir sənət nümunələri son vaxtlar Nizami Gəncəvi Beynəlxalq Mərkəzi tərəfindən şairənin ədəbi irsinin toplanması məqsədilə həyata keçirilmiş tədbirlər nəticəsində əldə edilmiş eksponatlar xəzinəsini daha da zənginləşdirib.
Ümumiyyətlə, Məhsəti Gəncəviyə aid dünyanın müxtəlif kitabxanalarında gətirilmiş 110-ə yaxın nadir nümunələr bu eksponatlar sırasındadır. Bu qiymətli incilərin hər biri üzərində geniş elmi-tədqiqat işləri aparılacaq. Heç şübhəsiz, əldə olunacaq elmi nəticələr yaradıcılığının 900 illiyini qeyd ertməyə hazırlaşdığımız dahi həmyerlimizin ölməz irsinin öyrənilməsinə sanballı töhfələr verəcək.
Azərbaycan Milli Elmlər Akademiyasının Gəncə Bölməsinin elmi işlər üzrə direktor müavini Samir Pişnamazzadə deyib ki, mərkəzə kraliça tərəfindən 8 miniatür və 1 illüstrasiya hədiyyə edilib. Miniatürlərin içində qədim əlyazmalar da var. Miniatürlərin bəziləri vaxtilə rusların Ərdəbil kitabxanasından İspaniyaya apardıqları sənət əsərləridir. Bəzi miniatürlər isə İspaniyanın özünə məxsusdur. İspaniya uzun müddət müsəlman dövləti olduğundan burada qədim şərq, ərəb-fars əlyazmaları çoxdur.
