Fəaliyyəti dayandırılmış Azərbaycan Beynəlxalq Universitetinin (ABU) keçmiş rektoru, hazırda Fransada mühacirət həyatı yaşayan Elşad Abdullayevin yaydığı sonuncu video böyük səs-küyə səbəb oldu.
Belə ki, Elşad Abdullayevlə eks-deputat Gülər Əhmədova arasında yaşanan rüşvət qalmaqalının əsas “qəhrəman”lardan olan Sevinc Babayevanın sonuncu videoda bəzi şəxslərin adı çəkməsi məsələni daha da qəlizləşdirib.
Xatırladaq ki, sözügedən videoda S.Babayeva keçmiş deputat Rza İbadovun adını çəkərək onunla parlament seçkiləri haqda danışdığını, bəzi məsələlər barədə eks-deputatın narazı qaldığını bildirib:
“Yazıq Rza (Rza Ibadovu nəzərdə tutur) özünü niyə öldürür? Deyir mənim kimi oğlanı qoyublar qırağa, alverçini, diktofonla danışanı çıxarıblar ora. Deyir mənim günahım nədir. Dağıdaram Azərbaycanı əgər keçməsəm. O da yanır ki, biabırçılıqdır. Nazim Ibrahimovun qardaşı biabırçılıqdır, bir kəlmə danışa bilmir. Utanmır özünə mahnı yazdırır. Mən sənə söz verirəm ki, komissiya sədri olacaqsan".-deyə S.Babayeva Elşad Abdullayevin yaydığı sonuncu videoda bildirib.
Məsələ ilə bağlı Modern.az-ın əməkdaşı hazırda Londonda yaşayan keçmiş millət vəkili Rza İbadovla əlaqə saxlayıb.
Eks-deputat əməkdaşımızla söhbətində bu məsələ ilə bağlı həftənin bazar ertəsi Modern.az saytına geniş açıqlama verəcəyini bildirib.
R.İbadov həmçinin qeyd edib ki, adının Elşad Abdullayevin yaydığı videoda çəkilməsi ilə bağlı təfərrüatları açıqlayacaq.
Qeyd edək ki, hazırda Londonda yaşayan eks-deputat barəsində axtarış elan edilib. Rza İbadov Cinayət Məcəlləsinin 148-ci (təhqir) və 147.2-ci (ağır və ya xüsusilə ağır cinayətdə ittiham etməklə böhtan atma) maddələri ilə təqsirli bilinir.
Rza İbadov 1995-ci ildə 1-ci çağırış Milli Məclisə keçirilən seçkilərdə mandat qazanaraq deputat seçilib. 2005-ci ildə parlament seçkilərinə qatılan Rza İbadov qalmaqallı kampaniyası ilə yadda qalıb. Rəqibi olan ARDNŞ-in prezidenti Rövnəq Abdullayevlə yarışan eks-deputat seçki kampaniyasının pozulduğunu əsas gətirərək seçkini yarımçıq qoyaraq o gündən Azərbaycanı tərk edib.
Anar RÜSTƏMOV
