Məşhur rus oliqarxı, bu yaxınlarda müəmmalı şəkildə ölən Boris Berezovskinin dünənki dəfni ərəfəsində onun 2008-ci ildə tanş olduğu qadın - nişanlısı Katerina Sabirova mərhum milyonerin ölümündən əvvəlki günlərdə özünü necə aparmasından danışıb.
Qeyd edək ki, Katerina Sabirova modeldir. Və o, Berezovskini ən son görən insanlardan biri olub. Model xanımın sözlərinə görə, ölümündən bir neçə müddət əvvəl Berezovski depressiyaya düşübmüş, hətta o vəziyyətdəymiş ki, günortayadək yatağından çıxmır, ən yaxın dostları ilə belə, görüşmürmüş.
Modern.az “İnoPressa”ya istinadən xəbər verir ki, Katerina Sabirovanın sözlərinə görə, keçən ilin sentyabr ayında “Çelsi” futbol komandasının rusiyalı sahibi Roman Abramoviçə uduzduğu məhkəmə prosesindən sonra Berezovski çox dəyişibmiş, hətta yemək yemir, evdən çölə çıxmırmış.
“O, deyirdi ki, özünü pis hiss edir və bilmir ki, bundan sonra necə yaşayacaq” - Sabirova deyib. O da Berezovskinin digər yaxın dostları kimi oliqarxın özünə qəsd etməsinə inanmır:
“Şübhə yoxdur ki, o dərin depressiya keçiriridi, amma mən inanmıram ki, özünü öldürüb. O heç vaxt belə bir iş görməzdi, hələ öz yaxınlarına məktub yazmaq... Mənim yadımdadır, bir dəfə mənə dedi ki, əgər onun Rusiyadan olan düşmənləri gələrsə, qorxduğu yeganə şey ağrılı ölümdür”.
Məşhur model həmçinin onu da deyib ki, Boris Berezovski o qədər pis haldaymış ki, hətta Rusiya prezidenti Vladimir Putinə iki səhifəlik məktub yazaraq, üzr istəyib və Rusiyaya qayıtmağa icazə verilməsini xahiş edib.
