“Dağlıq Qarabağ münaqişəsinin həlli ilə bağlı prinsiplərə razılıq verilməsinin vacibliyinin səslənməsi artıq ATƏT-in Minsk qrupunun həmsədrlərinin bu məsələdə nəticə əldə etmələrinin işartılarını göstərir”.
Modern.az-a açıqlama verən ATƏT PA-da Azərbaycan nümayəndə heyətinin rəhbəri, Milli Məclisin vitse-spikeri Bahar Muradova bildirib ki, son dövrdə Dağlıq Qarabağla bağlı qarşılıqlı səfərlər, danışıqlar intensivləşib. O bildirib ki, ATƏT PA-nın yay sessiyasında Siyasi Komitənin məruzə və qətnaməsində münaqişə ilə bağlı fikirlər öz əksini tapıb:
“Məsələ ATƏT PA-nın fəaliyyətinin bir növü kimi müzakirə olunacaq”.
ATƏT-in Minsk Qrupunun işi ilə bağlı sədr müavini bildirib ki, nəticənin olmaması ilə bağlı ATƏT-in Minsk qrupuna səslənən iradlar haqlıdır:
“Paradoks ondan ibarətdir ki, Minsk Qrupunun fəaliyyəti var, nəticə isə yoxdur”.
B.Muradovanın sözlərinə görə, Minsk Qrupunun fəaliyyətinin nəticəsizliyi ATƏT-in yay sessiyasında qaldırılacaq: “Dağlıq Qarabağla bağlı məsələ ATƏT-in yay sessiyasına salınmadığı üçün bu məsələyə həlli uzadılmış münaqişələrə münasibət kontekstində fikrimizi bildirəcəyik”.
Gültəkin ƏLƏSGƏR