Qazaxıstan prezidenti Kasım-Jomart Tokayev Müqəddəs Taxt-Tacın (Vatikan) dövlətlərlə əlaqələr üzrə katibi Pol Riçard Qallager ilə görüşüb.
Modern.az xəbər verir ki, bu barədə Qazaxıstan PA ("Aqorda") məlumat yayıb.
Müqəddəs Taxt-Tacın katibi ilə görüşdə Kasım-Jomart Tokayev Roma Papası Fransisk ilə söhbətin mənalı və məhsuldar olduğunu qeyd edib.
Prezidentin sözlərinə görə, Vatikanın ardıcıl dəstəyi Qazaxıstanın keçirdiyi dünya və ənənəvi dinlərin liderlərinin qurultaylarının dinlər arasında qarşılıqlı anlaşmanın və qarşılıqlı hörmətin möhkəmləndirilməsi üçün mühüm platformaya çevrilməsinə töhfə verib.
O, Katolik Kilsəsinin rəhbərinin ölkəmizə tarixi səfərinin sülhün təbliğinin mühüm rəmzinə çevrildiyini və təkcə Qazaxıstanın katolik icmasında deyil, həm də digər dinlərin nümayəndələri arasında geniş əks-səda doğurduğunu xatırladıb.
Kasım-Jomart Tokayev arxiyepiskop Pol Qallagerə Vatikan Kitabxanası və Apostol Arxivinin qazax alimlərinə tarixi materialları pulsuz öyrənmək imkanı vermək istəyinə görə təşəkkür edib.
Kasım-Jomart Tokayev Qazaxıstanın sülh, harmoniya və qarşılıqlı hörmətin möhkəmləndirilməsi naminə millətlərarası və dinlərarası harmoniyaya sadiqliyini bir daha təsdiqləyib.
Söhbətin sonunda o, Müqəddəs Taxt-Tacın rəhbərliyini Dünya və Ənənəvi Dinlər Liderlərinin Astanada keçiriləcək növbəti Qurultayında iştirak etməyə dəvət edib.
