Oktyabrın 5-də əmək və əhalinin sosial müdafiəsi naziri Fizuli Ələkbərovun iştirakı ilə Qax rayonunda yeni inşa olunmuş 4 mərtəbəli 36 mənzilli yaşayış binası Qarabağ müharibəsi əlilləri və şəhid ailələrinə, habelə 8 ədəd minik avtomobili müharibə əlillərinə təqdim olunub.
Tədbirdə bildirilib ki, 2003-2013-cü illərdə Prezident İlham Əliyevin tapşırığına əsasən, əlil və şəhid ailələri üçün mənzil tikintisi xeyli sürətlənib və müxtəlif bölgələrdə 4 mindən çox, ümumilikdə, 1997-ci ildən bu vaxta qədər 5 minə yaxın mənzil inşa etdirilərək Azərbaycanın ərazi bütövlüyü və Konstitusiya quruluşunun müdafiəsi uğrunda döyüşlərdə fiziki sağlamlıqlarını itirərək əlil olmuş vətəndaşlara və şəhid ailələrinə verilib.
2013-cü ilin sonunadək bir sıra bölgələrdə də çoxmənzilli yaşayış binalarının müharibə əlilləri və şəhid ailələrinin istifadəsinə verilməsi nəzərdə tutulur.
Hazırda əlil və şəhid ailələri üçün Bərdə, Şamaxı rayonlarının hər birində 1 ədəd 4 mərtəbəli 36 mənzilli, Goranboy, Tərtər, İmişli, Beyləqan, Ağdam rayonlarının hər birində 1 ədəd 6 mərtəbəli 54 mənzilli yaşayış binaları da inşa olunur. Həmin binaların cari ilin sonunadək istifadəyə verilməsi nəzərdə tutulur. Eyni zamanda, son 10 ildə müharibə əlillərinə 2800-dən çox maşın təqdim edilib. 1998-ci ildən bu vaxta qədər isə 3800-ə yaxın minik avtomobili imtiyazlı əlillərə verilib.
“Cari ildə 280 ədəd minik avtomobilinin əlillərə verilməsi nəzərdə tutulur ki, onlardan 180-dək avtomobil artıq verilib. Qarabağ əlilləri və şəhid ailələri onlara göstərilən böyük diqqət və qayğıya görə möhtərəm dövlət başçımıza minnətdarlıqlarını bildiriblər” deyə Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən
Modern.az-a verilən məlumatda bildirilib.
Modern.az
