Artıq Gürcüstanda parlament seçkilərində səslərin sayılması prosesi başa çatıb. Mərkəzi Seçki Komissiyası (MSK) məlumatına görə, 3 111 məntəqədən 3 110-nun bülletenlərinin nəticələrinə əsasən hakim “Gürcü Arzusu” Partiyası 53,92 % səs toplayıb.
Dörd müxalifət partiyası cəmi 37,78 % səs yığa bilib. Onlardan “Dəyişiklik Koalisiyası” 11,04 %; ”Vahidlik – Milli Hərəkat” 10,16 %; ”Güclü Gürcüstan” 8,81 %; ”Qaxariya - Gürcüstan naminə” Partiyası isə 7,77 % səs toplayıb. Marneulidəki 69 saylı məntəqədə kütləvi bülleten atılması hadisəsi baş verdiyi üçün səsvermənin nəticələri ləğv edilib.
Beləliklə “Gürcü Arzusu” Partiyası yenidən qələbəni təmin edib.
Seçkilərin nəticələrini Modern.az-a şərh edən gürcü ekspert David Çxelizade qeyd edib ki, ölkədə seçkilər dinc və rəqabət şəraitində keçib:
“Xarici qüvvələrin Gürcüstanın daxili işlərinə qarışmaq cəhdlərinə baxmayaraq, insanlar öz iradələrini ifadə etmək imkanı əldə edə bildilər. Demək olar ki, oktyabrın 26-da keçirilən seçkilərdə gürcü xalqı və ölkənin əmin-amanlığından, inkişafından və tərəqqisindən möhkəm danışan gürcü xalqı qalib gəldi".
O bildirib ki, Gürcüstanın düşmənləri növbəti dəfə qəzəblənib:
"Belə ki, Gürcüstanın müstəqil ölkə olması, gələcəyini və istiqamətini kollektiv Qərbin deyil, gürcü xalqının həll etdiyi ilə barışmalı olacaqlar".
