Türkiyənin İranın nüvə proqramı ilə bağlı problemin həllində vasitəçilik səyləri bəhrə verməkdədir. Modern.az BBC-yə istinadən xəbər verir ki, rəsmi Tehran Brazilyanın iştirakı ilə Türkiyə və İran arasında aparılan danışıqlardan sonra problemin həllində kompromiss əldə olunduğunu bildirir. Türkiyənin xarici işlər nazirli Əhməd Davutoğlu bəyan edib ki, Braziliyanın vasitəçiliyi ilə İran – Türkiyə danışıqlarında razılaşma əldə olunub. Davutoğlu danışıqların 18 saat davam etdiyini deyib. Onun sözlərinə görə, razılaşma artıq bu gün elan oluna bilər.
Qeyd edək ki, Türkiyənin baş naziri Rəcəb Tayyib Ərdoğan Tehrandadır. Onun prezident Mahmud Əhmədinejat və dini lider Ayətullah Xameneyi ilə görüşləri nəzərdə tutulub. Braziliya prezidenti Lula de Silva isə artıq hər iki İran lideri ilə danışıqlar aparıb. Görüşlərdən sonra Silva bəyan edib ki, kompromis əldə olunması ümidləri artıb.
ABŞ və Avropa ölkələri bəyan edir ki, üçtərəfli danışıqlar İrana sərt sanksiyaların tətbiqinin qarşısını ala bilər.
Ən son məlumata görə, Tehran uranın Türkiyədə zənginləşdirilməsinə razılıq verib.
