Ermənistanın birinci prezidenti Levon Ter-Petrosyan ikinci dövlət başçısı Robert Köçəryanın hakimiyyətə qayıdışı ilə bağlı gizli razılığa gəlibsə, bu Erməni Milli Konqresindəki tərəfdaşları ilə ciddi problem yaradacaq. Modern.az Ermənistan KİV-nə istinadən bildirir ki, bunu bu gün keçirilən mətbuat konfransında “Ayazn” Partiyasının idarə heyətinin üzvü Armen Ağayan deyib. Onun sözlərinə görə, əgər “Çiçəklənən Ermənistan” Partiyasının arxasında Robert Köçəryanın dayanmasından danışırıqsa, bu o deməkdir ki, Levon Ter-Petrosyan ikinci prezidentin yenidən hakimiyyətə qayıdışına razıdır, onun vaxtında – 2008-ci il martın 1-də isə faciəli hadisə baş verib: “Yalnız bu səbəbdən Ter-Petrosyan Köçəryanın qayıdışına imkan verməməlidir. Əgər Köçəryan hakimiyyətə gələrsə, birinci prezident də onu dəstəkləyərsə, onda tərəfdaşları ilə ciddi problemi yaranacaq”.
Modern.az
