Rusiyanın Sankt-Peterburq şəhərində Rusiya, Azərbaycan və Ermənistan prezidentləri Dmitri Medvedev, İlham Əliyev və Serj Sərkisyan arasında növbəti üçtərəfli görüş gözlənilir. Modern.az Ermənistanın “Armtoday” agentliyinə istinadən xəbər verir ki, bu barədə məlumatı Ermənistan prezidentinin mətbuat xidməti yayıb. Məlumatda qeyd olunur ki, Sankt-Peterburq görüşündə dövlət başçıları Ermənistan – Azərbaycan, Qarabağ münaqişəsinin nizamlanması üzrə danışıqların hazırkı mərhələsini müzakirə edəcəklər.
Serj Sərkisyan iyunun 17-19-də Sankt-Peterburqda keçiriləcək ənənəvi Beynəlxalq İqtisadi Forumda iştirak etmək üçün Rusiyaya 3 günlük rəsmi səfərə gedəcək. Səfər Medvedevin dəvəti ilə həyata keçirilir. Xəbər verlir ki, üçtərəfli görüş də bu forum çərçivəsində keçiriləcək.
Qeyd edək ki, prezidentlər sonuncu dəfə yanvarın 25-də Soçi şəhərində bir araya gəliblər.
