Modern.az

Azərbaycanda 324 mindən artıq şəxsə aylıq sosial müavinət ödənilir

Azərbaycanda 324 mindən artıq şəxsə aylıq sosial müavinət ödənilir

İqtisadiyyat

15 May 2014, 15:26

Cari ilin 1 aprel tarixinə Azərbaycanda 13334 nəfər yaşa görə,  121856 nəfər əlilliyə görə, 39342 nəfər ailə başçısını itirməyə görə, 63094 nəfər sağlamlıq imkanları məhdud 18 yaşınadək uşaq olduğuna görə aylıq sosial müavinət alır.

Bu barədə Modern.az-a Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən məlumat verilib.


Rəsmi məlumata görə, müharibə veteranı  və qanunvericilikdə nəzərdə tutulan digər güzəştli kateqoriyalardan olan 49 476 nəfər də hər ay sosial müavinətlə təmin olunur.

Ümumilikdə ölkədə aylıq sosial müavinət alanların sayı qeyd olunan tarixə 324122 nəfərdir.

Eyni zamanda, bu ilin ilk rübündə 34171 nəfərə, o cümlədən  28470 ailəyə uşağın doğulmasına görə, 4114 nəfər radiasiya qəzası nəticəsində zərərə çəkərək əlil olmuş şəxsə müalicə üçün, penitensiar müəssisələrdə cəza çəkməkdən azad edilmiş 971 nəfərə və dəfn üçün 616 nəfərə birdəfəlik müavinət ödənilib.

Ölkədə sosial müavinətlərin orta aylıq məbləği ötən ilin 1 aprel tarixinə olan göstərici ilə müqayisədə 10 faiz artıb. Həmçinin, Azərbaycan Respublikası Prezidentinin 17 mart 2014-cü il tarixli Fərmanı ilə  əmək pensiyası almaq hüququ olmayan müharibə veteranlarına güzəştlərin əvəzində aylıq olaraq ödənilən 37 manat məbləğində müavinət cari il aprelin əvvəlindən 22 faiz artırılıb.

Dövlət başçısının 2014-cü il 17 mart tarixli Fərmanına əsasən isə əlillik ümumi xəstəlik, hərbi xidmət dövründə xəstələnmə, əmək zədəsi və peşə xəstəliyi, hərbi əməliyyatlar keçirilən zonada olmaqla və  Çernobıl AES-də qəzanın ləğvi ilə əlaqədar səbəblərdən baş verdikdə I qrup əlilliyə görə sosial müavinət alanlara hər ay aldıqları 67 manat sosial müavinətlə yanaşı, cari ilin aprel ayının 1-dən etibarən ayda 60 manat olmaqla Azərbaycan Respublikası Prezidentinin təqaüdü də ödənilir.

Modern.az

Whatsapp
Bizə yazın!
Keçid et
Ukrayna ordusu dəhşət saçdı: Rusiya ərazisi vuruldu