Elman Rüstəmov ölkənin bank sisteminin sükanını növbəti dəfə əlində saxlamağa müvəffəq oldu.
Modern.az-ın məlumatına görə, iqtisadçı Samir Əliyev bildirib ki, gözlənilməz hadisələr baş verməsə, E.Rüstəmov daha 5 il ölkənin bank sektoruna rəhbərik edəcək: “Elman Rüstəmov 20 ildir bu sistemə rəhbərlik edir. Bank sisteminin inkişafında onun rolu danılmazdır. Bu sektorun uğuruna da, uğursuzluğuna da cavabdehlik daşıyır. Elman Rüstəmov hakimiyyətin 2-3 peşəkar kadrlarından biri hesab olunur. Hətta müxalifət də bunu etiraf edir”.
“Yenidən təyinat gözlənilən idimi” sualına iqtisadçı “bəli” cavabını verib: “Çünki indiki həssas məqamda Elman Rüstəmovun postunu tərk etməsi riskli idi. Məşhur deyim var: “Atları keçidlərdə dəyişmirlər”. Mövcud bank sistemini Elman Rüstəmov qurub və onu ancaq özü idarə edə bilər. İndiki dövrdə sistemin başına başqasının gətirilməsinin ağır fəsadları ola bilər. Elman Rüstəmovun vəzifədə qalması həm də hakimiyyətin bank sektorunda ciddi addımlar atmaq niyyətində olmadığını göstərdi”.
Samir Əliyev Mərkəzi Bankın kommersiya bankları ilə olan münasibətlərinə də aydınlıq gətirib: “Mərkəzi Bankın rəhbəri daim banklara münasibətdə konservativ yanaşma tətbiq edib. Bankların xarici maliyyə bazarına çıxışı məhdud olub, xarici bankların ölkəyə daxil olması mümkünsüz edilib.
O, rəhbərliyi dövründə əhalinin banklara və milli valyutaya inamının bərpasına nail olub. Ölkədə dollarlaşma səviyyəsi aşağı düşüb. İnflyasiya səviyyəsi, o cümlədən idxal inflyasiyası minimuma endirilib. Təəssüf ki, bank sektorunda kredit faizlərinin yüksək olması, kiçik və orta sahibkarlığın kreditə əlçatanlığının zəif olması, bankların məhdud xidmətlər göstərməsi, bank müştərilərinin hüquqlarını pozulması kimi problemlər həllini tapa bilməyb. Bu azmış kimi, neftin ucuzlaşması fonunda yaranmış vəziyyət, devalvasiya göstərdi ki, bank sektorunun dayanıqlığı zəifdir. Qısa müddətdə insanların banklara və manata olan etimadı itməyə başladı. Bankların isə müflisləşmə təhlükəsi daha da yaxınlaşdı”.
S.Əliyev bildirib ki, köhnə-yeni sədrin fəaliyyətinin müsbət və mənfi tərəfləri barədə kifayət qədər danışmaq olar:
“Ancaq bir məsələni xüsusi vurğulamaq istəyirəm, Azərbaycanın mövcud bank sistemi ölkə iqtisadiyyatına adekvatdır. Mövcud iqtisadi durumda bundan yaxşı bank sistemi qurmaq çətin görünür. Ancaq onu da qeyd edim ki, bank sektorunu uzun müddət indiki səviyyədə saxlamaq mümkün olmayacaq. Zəruri addımlar atılmasa, böhranın olması qaçılmazdır.
Növbəti 5 il Elman Rüstəmov üçün çox çətin keçəcək. Çünki qarşıda onu növbəti devalvasiya ehtimalı və onun törədəcəyi fəsadlar, neft gəlirlərinin azalması səbəbindən yavaşımış iqtisadiyyat, yüksək inflyasiya təyziqi gözləyir”.
Gülşən RAUFQIZI
